Yimpi yabomakhelwane kuCastle Lager

14 Mar, 2024 - 00:03 0 Views
Yimpi yabomakhelwane kuCastle Lager uFarai Tawechera

uMthunywa

Nkosilathi Sibanda

KULIMPELAVIKI kulombango wabomakhelwane koBulawayo, kumdlalo wenguqu kuligi yeCastle Lager.

Akusoze kube lokuzwisisana okwesikhathi eside njalo impi le isivele yaqala enkundleni zokuxhumana.

IChicken Inn izadlala labafana abachinsa inkundla eziphezulu, abe-Arenel Movers eLuveve ngoMgqibelo. IBulawayo Chiefs inxuse “abafowabo” iHighlanders eBarbourfields ngeSonto. 

Okuphuma kumidlalo le yikuthi amaqembu womane alabadlali abayintanga inye njalo baphila bonke koBulawayo. Ngempelaviki bazaxatshaniswa yinguqu ngoba akula ozavuma ukuthi iqembu lakhe linqotshwe lula.

Labaqeqetshi batshayisana mihla yonke ezitaladeni lasendaweni zokuzilibazisa, kodwa bazathi ukumisa ubuhlobo lobu kancane, baphenduke izitha ngamalanga emidlalo. 

Kumidlalo yokuvula isizini, iBosso ingene iledlabuzane yadlula igijima phezulu kweDynamos yanqoba nge 2-1.

Kube lilanga lenjabulo kubalandeli beHighlanders bona abalokhe bephethe bekhuluma ngalumdlalo.

uFarai Tawachera

Abalandeli beBosso ababili abakhulume leZimpapers Sports Hub kuliviki bathe ukunqoba iDynamos kumdlalo wakuqala kuveza ukuthi iqembu lilenhlanhla kulisizini.

UMncedisi Jiyane, ohlala elokitshini leCowdray Park uthe amaqembu azalandela, afana leBulawayo Chiefs kuzamele aqaphele.

“Ngiyawazwela amaqembu esizadlala lawo. Ukunqoba isitha esinjenge Dembare kutsho ukuthi lonyaka sizatshaya ezinengi. Liqinile iqembu, siyalethemba. Kumdlalo wethu leBulawayo Chiefs, silokukholwa ukuthi abadlali bethu bazakwenza esakubona mhla sitshaya iDynamos,” kutsho umlandeli lo.

Omunye umsekeli weHighlanders, uJealous Nkomo uthe: “Sithabile kodwa ngikhuthaza abadlali ukuthi bachume ngoba iBulawayo Chiefs iyasidelela kwezinye izikhathi. Bayazi ukuthi siliqembu elinjani ngoba abadlali bayazana futhi.

“Okwethu njengabasekeli yikuthi siyegcwalisa inkundla, sihlabele sibakhuthaze ukuthi banqobe.”

IBulawayo Chiefs yadliwa yiGreenfuel 2-1. Iphenduka koBulawayo ilolaka ngoba ihlatshiwe. Ubuhlungu elabo ingabuqedisela phezulu kwabadlali bakaKelvin Kaindu.

Lokhu kungatsho ukuthi iHighlanders inanzelele.

Abafana beChicken Inn, abadume ngelithi, amaGamecocks, bavule isizini ngokunqoba iCAPS United 1-0 enkundleni yeBata enkabazwe.

AmaGamecocks, aqeqetshwa nguJoseph Antipas, angene kumdlalo wesibili etshaywa luvalo ngalokhu abakuzwe kuvela eqenjini le-Arenel Movers.

Ngenxa yokuthi i-Arenel imisane lentshantshu iNgezi Platinum, kwabangutshiki lobhanqa 0-0, akumphathi kakuhle u-Antipas.

Umqeqetshi we-Arenel Movers uFarai Tawarechera usethole ukuphakanyiswa ngokutshintsha umdlalo weqembu leli nanko selithole inhlonipho lisanda kufika enkundleni eziphakemeyo ezePSL.

Okuzavula Amehlo ngalumdlalo yikuthi uTawachera usebenze okwesikhathi eside kuChicken Inn. Umqondo ka-Antipas uyawazi. Abaqeqetshi bobabili ngabangane uqobo kunguqu.

Imidlalo ngeviki lesibili kuligi yeCastle Lager:

NgoMgqibelo:

Simba Bhora v Greenfuel (Wadzanai Stadium), TelOne v Manica Diamonds (Bata Stadium), Ngezi Platinum Stars v FC Platinum (Baobab Stadium), Chicken Inn v Arenel Movers(Luveve), Herentals v CAPS United (Nyamhunga), Dynamos v Hwange (Barbourfields Stadium).

NgeSonto: 

Bulawayo Chiefs v Highlanders (Barbourfields Stadium), Chegutu Pirates v ZPC Kariba (Baobab Stadium)

Share This:

Sponsored Links

Survey


We value your opinion! Take a moment to complete our survey

This will close in 20 seconds