Bayamncoma u-Isaac Mpofu

18 Apr, 2024 - 00:04 0 Views
Bayamncoma u-Isaac Mpofu U-Isaac Mpofu

uMthunywa

Lovemore Dube

U-ISAAC Mpofu, inzalo yeTinde esabelweni seMatabeleland North, wenze isimanga kuBoston Marathon eMelika ngokuqeda umncintiswano lo engowesithupha.

Okuncomekayo ngokwenza kwakhe yikuthi uqede umango lo, ephambili ngemizuzu eyisithupha nxa kuqathaniswa lesikhathi somnyaka odluleyo. Ngalowomnyaka, wayeqede ekunombolo yetshumi lasitshiya galolunye, okutsho ukuba lonyaka usebenze gadalala lomqeqetshi wakhe uBenson Chauke.

UChauke nguye njalo ololonga umgijimi lo, kumalungiselelo wokuya kuma-Olympics.

UMpofu ubengowakuqala kuleli ukuthola itikiti lokuya kumncintiswano omkhulu, ama-Olympics, azaqhutshelwa edolobheni leParis, eFrance ngoNtulikazi lonyaka.

Owake wabangumgcinisihlalo wenhlanganiso ephethe umdlalo wokugijima koBulawayo, uManuel Mpofu uveze ukuthi u-Isaac ngumgijimi ozithobileyo njalo osebenza gadalala.

UManuel uthe ngesikhathi engumaqhuzu, uIsaac umphakamise kakhulu ngoba ubethi angakhethwa ukuya mela isabelo afike anqobe.

UManuel osenguye osebenza nsukuzonke ukubona ukuthi inhlelo zokugijima, ukujika lokweqa zihamba kuhle eZimbabwe, uthe: “Ngizizwa ngilokuthokoza kakhulu ngomsebenzi awenzileyo ngoMvulo kweleMelika uIsaac.

“Usebenze gadalala, esuka phansi egijima lami ngingumgcinisihlalo wesabelo sakoBulawayo. Bekusithi singamkhetha ukuthi ayesigijimela aphenduke lemivuzo.

“Akusinhlanhla, yikusebenza ngokuzikhandla akwenzileyo njalo kufuze akwamukele ngoba yizithukuthuku zakhe,” kutsho uManuel.

U-Isaac ugijime i-2 hours 08 minutes 17 seconds esesula isikhathi somnyaka odluleyo ese-2 hours 14 minutes.

Ukuba ngowesithupha kumdlalo lo kunikeza ithemba lokuthi kuma-Olympics angenza ngcono.

IBoston Marathon ilebizabiza njalo kuncintise abagijimayo abavela kumazwe onke alodumo lokugijima, agoqela i-Eritrea, Ethiopia, Uganda, Kenya, Tanzania, Poland, England, Rwanda, Burundi, Japan, China leMelika.

UJames Rugwevera oke waduma enguye oqeqetsha uSingazi Dube, Magaret Mahohoma, Busisiwe Nyoni, Sibusiso Nyoni labo Zondiwe Nyoni eAmandlethu eLupane, laye uzizwe ejabula ngesenzo sika Isaac.

“Sithi halala Mpofu, usebenzile jaha. Uphakamise uBulawayo, iTinde leZimbabwe yonke. Ngilethemba ukuthi intsha elandelayo izalandela lapho onyathele khona,” kutsho uRugwevera.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds