uMthunywa
Innocent Kurira
LAMUHLA emcimbini wokuthakazelela ilanga likaZibuse, abathandi bomdlalo wokugijima bathola ukudla kwamehlo kumncintiswano weCoca-Cola Four-Minute Mile enkundleni yeWhite City koBulawayo.
Umncintiswano lo uzaqhutshwa ngesikhathi sekhefu lomdlalo wenguqu ozabe uphakathi kweChicken Inn leBulawayo City.
Lokhu kuqinisekiswe ngumgcinisihlalo wenhlanganiso yeBulawayo Athletics Board (Bab) uWatson Madanyika, obikele iZimpapers Sports Hub ukuthi kuzancintisa labagijimi abavela endaweni ezibalisela iHarare, Masvingo, Mutare, Gwanda, laseBeitbridge.
“Silindele inqwaba yabagijimi kumncintiswano wethu walamuhla wokudinga labo abazaqhubekela phambili besiya kuCoca-Cola Four-Minute Mile. Ngilethemba lokuthi inengi labantu elizakuthi gwaqa eWhite City lamuhla, lizakhuthaza labo abazancintisa, ukuze benze kuhle.
“Kulimpelaviki, sizaphindela emangweni, siqonde edolobheni leGwanda ukuyaqhuba umncintiswano ofanayo, nanko phela amalanga womncintiswano omkhulu ozabe useTrade Fair koBulawayo asesondele,” kutsho uMadanyika. Kumjaho weCoca-Cola Four-Minute Mile kusadingwa lo ongenelisa ukuwuqeda ngesikhathi esiphansi kwemizuzu emithathu.
Obusayo ngokunqoba kulumncintiswano nguWellington Varevi, osetshaye intambo iminyaka emithathu ilandelana. Nyakenye uVarevi utshaye intambo ngemizuzu emine, lemizuzwana elitshumi lanhlanu phakathi kwabagijimi abalitshumi lesikhombisa. Ngomnyaka ka2022, uVaveri wayegijime imizuzu emine, lemizuzwana elitshumi lantantu.
“Ngomnyaka odluleyo, uGodwin Katakura uqede esendaweni yesibili ngesikhathi esiyimizuzu emine lemizuzwana engu-17,71.
UNyasha Mutsetse waqeda esendaweni yesithathu ngemizuzu emine, lemizuzwana engu-61.
