uMthunywa
Lovemore Dube
UBHEKIMPILO Nyoni ongumnikazi weBN Academy elolonga abasakhulayo kumdlalo wenguqu uthi bakhathele ngamaqembu athatha abafana babo, engabhadali lutho.
Uthe lokhu kubulala imizamo yokuphakamisa ibhola kuleli.
Ekhuluma lephephandaba likazulu, uthe akusumthwalo omncane ukuba leqembu labasakhulayo.
Ukhale ngokuthi amaqembu amakhulu athatha abadlali babo ngodli, okwenza bengenelisi ukuthenga amabhola lokunye okusetshenziswayo ekukhuliseni abadlali.
“Siyakhala singamakolitshi omdlalo wenguqu ngamaqembu amakhulu akuDivision One loTwo. Nxa efuna ukuthatha umdlali othile, abafuni ukubhadala,” kutsho uNyoni.
Ugcizelele lokuthi lamaqembu akubanga lePremier Soccer League kawalazwelo, esithi athatha abafana mahala.
Uthe abaqeqetsha amaqembu la kabala lanhlonipho eyokuthi baxoxisane.
“Batshela abafana ukuthi baze lama-clearance letters. Uzwe sebesithi ungabandezeli phansi isiphiwo somfana, umyekele ahambe,” kutsho uNyoni.
Okubuhlungu njalo yikuthi labazali babadlali benza okufanayo, bevumelana lamaqembu.
“Lomzali uyajikisa athi umfana kayekelwe aqhubekele phambili. Kubuhlungu lokhu.
Uthe abakufunayo bengama-academy yikuthi abaphathi bomdlalo kuleli, abeZifa, bakubeke sobala ukuthi nxa kulomdlali osuka kuma-juniors loba ku-Academy kumele kuphume mhlawumbe i-US$500 kuqembu likaDivision Two, US$1000 kuDivision One leUS$3 000.
Isikhalazo sikaNyoni labanengi ngesokuthi bahletshunelwe mbijana ngoba amaqembu amakhulu adlangabo.
“Siyasebenza lathi siyabe sikhangelele ukuthi sibone ukuthi singazuzani ukuze sibumbe abanye ngamabhola lokunye okusetshenziswayo.”
