‘Lizafunda ukulinda balandeli, ngeke liyinuke i-kit okwamanje’

Innocent Kurira

ISIKHONA i-kit entsha yeHighlanders kodwa abalandeli bayo bazayigqoka ngemva kwenyanga ezimbili, kutsho uSihlangu Dlodlo.

UDlodlo ngumaqhuzu omutsha weqembu.

Uveze lokhu ngesikhathi ekhuluma labalandeli beBosso kusethulwa i-ikit yeqembu yalonyaka. 

Kumaviki ambalwa adluleyo amaqembu eHighlanders leDynamos athengelwe impahla entsha yokusebenzisa lonyaka yiSakunda Holdings.

ISakunda Holdings isekele amaqembu la kusukela ngesizini ka-2021. Ukungenela kwayo ngosekelo lwemali kwancedisa kakhulu ngoba amaqembu womabili ayengeke enelisa ukuqhuba inhlelo zawo kungelamali.

Kulandela usekelo oluvela kunkampani yeSakunda Holdings, amaqembu la kukhangelelwe ukuthi agqoke impahla entsha le lamuhla, edibana kunkezo kaZibuse.

Umdlalo usesigabeni seMurambinda, eBuhera, esabelweni seManicaland.

Kodwa, njengoba uDlodlo esitsho, abalandeli bazathola izikipa ngemva kwenyanga ezimbili.

“Izikipa ezithengiselwa abalandeli zizakuba khona kunyanga ezimbili ezilandelayo. Indlela yokuletha izikipa lezi isuke yaphazanyiswa likhefu le-Ramadan ngoba lezimpahla sizithenge eDubai,” kutsho uDlodlo.

Kubikwa nxa iBosso ingasoke ingene kunkezo kaZibuse igqoke i-kit entsha, abalandeli bayo bazathola ukuyibona ngeSonto mhla ingqikilana leChicken Inn kumdlalo weCastle Lager Premiership.

“Kuhlala kukuhle ukuthi abantu ubamangalise ngokwenzileyo. Kungenzakala. Kodwa kangitshongo ukuthi bazayigqoka kuZibuse. ilanga likaZibuse lisaKhisimusi phela,” kutsho uDlodlo ekhuluma lentatheli yeZimpapers Sports Hub.

Iqembu leHighlanders lisuke koBulawayo ngoLwesibili ekuseni liqonde eMurambinda B High School okulombuthwano omkhulu walonyaka, okaZibuse.

Kungokwakuqala ukuthi umdlalo kaZibuse wenzelwe esigabeni seManicaland. Kuyisinqumo sikaHulumende ukuthi imikhosi kaZibuse lomdlalo wamaqembu la, uqhutshwe phandle kwamadolobho.

Ngomnyaka odluleyo ubuseMount Darwin.