Ziyadibana ezinkulu…Bosso ithi ngeke ivume, izabaphinda futhi

uMthunywa

Nkosilathi Sibanda

LONYAKA “ezinkulu” kumdlalo wenguqu zibuthanise abalandeli bazo emaphandleni, eBuhera, esabelweni seManicaland.

Kudibana iHighlanders leDynamos.

Kusukela ngomnayaka ka-1983 amaqembu womabili asencintisane kulinkezo kaZibuse. 

Kumdlalo kaZibuse lo, uMongameli welizwe uEmmerson Mnangagwa uzabe engumhlonitshwa waphezulu.

IHighlanders seyanqoba inkezo le kumidlalo elitshumi njalo yiyo eyaba yintshantshu ngesizini ka-2023 lapho eyanqoba khona iDynamos nge 5-3 kumbekwa. Umdlalo wawuphele kungutshiki lobhanqa, kuyi 0-0.

Lonyaka, ngokuzwa kwephephandaba likazulu, inkezo le izakuba lomvuzo ophezulu, nanko kulehungahunga lokuthi inkampani yeSakunda Holdings isiqoqe ukuthi iphosele okuthile.

Inkampani le yiyo njalo egqokisa amaqembu womabili, iphinde iwasekele ngemali.

Ekhuluma lentatheli kaMthunywa ngoLwesithathu, umgcinisihlalo weHighlanders uKenneth Mhlophe uthe iqembu lakhe lizafuna ukuthi liphendukise inkezo ekhaya.

“Engingakutsho yikuthi sizanqoba. Abafana bathe loba sekutheni ngeke bayivumele iDynamos isidla. Ngamafitshane ngithi inkezo izaphenduka ekhaya,” nguMhlophe lo ekhuluma lentatheli yephephandaba likazulu, andubana abhekise amabombo esiya eBuhera.

Umqeqetshi weHighlanders uKelvin Kaindu uthe lo ngumdlalo ophezulu ngakho bawulungiselele njalo ngeke bawuthathe kancane.

UKaindu uthe izinga lokuzethemba liphezulu enkambeni yabadlali, okuveza ukuthi kukhulu okuzavela.

“Silungiselele, esikufunayo kunye kuphela, ukunqoba. Ngumdlalo omkhulu njalo kuyaziwa ukuthi ukudibana kwamaqembu la akusinto elula ngoba ngamaqembu amakhulu. Kasikhangeleleni ukuthi kuzakuba ngumdlalo ojabulisayo,” kutsho lumqeqetshi.

Ukaputeni weBosso u-Ariel Sibanda utshele intatheli ukuthi uzabakhuza abadlali bakhe, bayiqondise iDynamos.

“Sabadla kumdlalo wethu weligi, sizabaphinda futhi.”