uMthunywa
YiNtatheli kaMthunywa
Amapholisa eSouth Africa adinga inina elizalwa eMutare kodwa ebelihlala eCape Town kweleSouth Africa elinyamalale ngemva kokutshisa umkalo ngamafutha okupheka kubangwa imali obekumele isetshenziswe ukulilobola ebuye yayitshontsha yabaleka layo.
UMoreblessing Nyakunu (40) kubikwa waxabana lomkakhe uMoses Mtukwa (41) ngesizatho semali okuyiyo eyabangela ukuthi amthele ngamafutha abilayo, okwabangela ukuthi indoda le ife ngenxa yamanxeba esibhedlela seCape Town ngoLwesine kuviki edluleyo.
UMoses ubeselamaviki amabili elalisiwe esibhedlela njalo ubencediswa ukuphefumula ngumtshina, ngokutsho komnawakhe uDavison Mtukwa.
Exoxa lentatheli uDavison uthe ngemva kokuba uMoreblessing esetshise umkakhe ngamafutha watshontsha iR31 000 le US$800 okuyimali eyayigcinwe ngumkakhe yokuyalobola, wanyamalala.
“Umnewethu ufe ngemva kokulimala etshiswe ngumkakhe ngamafutha okupheka. Okubuhlungu kakhulu yikuthi uNyakunu kazange asitshele ukuthi umnewethu usesibhedlela. Sonke isikhathi sasisithi nxa simfonela wayephendula sengathi akulahlupho. Udadewethu wayethi nxa emfonela eseSouth Africa edinga uMoses, uNyakunu wayesithi uMoses ungekhaya yena usemsebenzini,” utsho njalo.
UDavison uthi baze babakwazi ukuthi umnewabo usesibhedlela ngemva kwensuku ezinhlanu ngemva kokuba omunye olenhliziyo enhle emgijimisele esibhedlela wasetshela udadewabo.
“Ngaleso sikhathi, uMoses esakhuluma watshela udadewethu ukuthi endlini ule R31 000 leUS$800. Wathi imali le ngeyokulobola uNyakunu. Wake wangitshela ngemali yakhe ayeyigcina ehlose ukuya koNyakunu ukuze siyeqedisa ezinye imali zamalobolo,” utsho njalo.
Davison Mtukwa
UDavison uthe udadewabo wathi efika endlini kaMoses wathola kungelamuntu futhi lemali ingekho ngoba uMoreblessing wayesebaleke layo.
Umnewethu uMoses ulomntwana loMoreblessing ababa laye besahlala eBvirindi, eZimunya. Bake behlukana futhi samangala sesisizwa ukuthi sebebuyisene sebeseSouth Africa.
“Bobabili bake baphenduka ekhaya bakhipha enye ingxenye yamalobolo. Kasizange sike sizwe ngokulwa kwabo. Bebekhanya bezwanana kakhulu kungakho sethuka sesisizwa ngemfa le.
“Umnewethu engakasebenzisi imitshina ukuphefumula watshela udadewethu ukuthi utshiswe nguNyakunu ngamafutha abilayo ngoba wayefuna ukusebenzisa imali yamalobolo okunye. Ngemva kokumtshisa omakhelwane yibo abamgijimisela esibhedlela.
“Umkakhe wahle wanyamalala lemali. Amapholisa akweleSouth Africa alokhu emdinga ngecala leli,” utsho njalo.
UDavison uthe balemilayezo eyayithunyelwa phakathi kukaMoses loMoreblessing. Kumlayezo le uMoreblessing wayechaza ukuthi imali le uyayifuna ufuna ukuyisebenzisa okunye abesezadinga eyamalobolo.
Unina kaMoreblessing uGogo uLoveness Nyakunu labanawakhe bebekhathazekile ukuthi bangayilungisa njani indaba le.
UGogo Nyakunu uchaze indodakazi yakhe njengomuntu othanda udlakela.
“Kangifuni ukuqamba amanga, uMoreblessing ngumuntu othanda udlakela ohlala futhi exabana labanawakhe, kodwa kasizange kesicabangele ukuthi kungafika kulesi isibanga.
“Besingacabangeli ukuthi angabulala umkakhe, ngethuka ngisizwa indaba le eyesabekayo. Ngake ngaqaleka ekilinika kodwa ngabuye ngaphaphama,” utsho njalo.
