uMthunywa
INENGI labasakhulayo kulezi insuku alusalwazi uthando, alusakwazi ukuthi kumele luphathe njani imuli zabo. Sekuhlala kuliwa kubotshiswana kuhanjiswana enkantolo izithandani zisehluleka ukuphilisana.
Nxa usuthe wathola usomoya wakho kumele uzimisele ukuba uzamthanda kuze kube nini. Uthando olukhona khathesi akuseyilo loqobo ngoba abantu bathandana ngesikhathi esithize kumbe nxa befuna okuthize.
Uthola abantu bengamathe lolimi ngelanga lokuzalwa lomunye wabo kanye, lakulolo suku olungasilwethu kodwa lwavela ezizweni.
Umuntu oyabe esenza lokho uyangimangalisa kakhulu ngoba lokhu kuveza ukuthi amalanga wonke omnyaka uyabe ekhohliwe ukuthi wathi ethatha umuntu wathi yena uzamthanda impilo yakhe yonke kodwa nxa semtshengisa uthando kabili ngomnyaka kuyabe kuvezani.
Phela uthando oluvutha nsukuzonke ngoluvuselelwa nsukuzonke hatshi ukuthi kuhlalwe nje kungakhunjuzwani ukuthi lokhe kusathandwana.
Kulezinsuku sekugcwele okungamajaha lokhu okubizwa ngokuthi ngo-Ben 10 okuthwalise amaxhegu, ngitsho phela obaba bethu nzima ngokubathathela abafazi babo.
Esikhathini esinengi nxa umfanyana sehlanyisa unkosikazi wakho kusolwa umfazi ebizwe ngamagama athi libele lendlela kusukwe kungakhangelwa ukuthi yena mkakhe umtshengisa uthando olunganani umfazi wakhe okuze kwamenza wahamba wamtshiya.
Umfana engafohla uthango ufika amtshengise umkakho olunye uthando olumangalisayo wena owacina ukumtshengisa lona kudaladala usanda kumthatha kumbe usamqomisa.
Uthando luyisikhonkwane somtshado ngakho asihlalahlaleni sikhumbuze omkethu ukuthi siyabathanda. Singakwenza lokho uzabona besithanda yiloba singohwayibhetshu nje. Usofa silahlane kabuyi nje mahala ubuya lothando olujulileyo.
Kuhle ukuthi ungaya emsebenzini baba kumbe mama uhlalahlale utshaye ucingo ubuza omunye wakho ukuthi angabe etshone njani. Umuntu loba ecabanga ukuganga ungamenzenje uyawugoqa umsila wakhe atshaywe ngunembeza.
Isiko lalo lingaba linengi kakhulu kwesinye isikhathi liyahlupha. Asali ukuthi umfazi kumele akwenzele konke endlini kodwa akumelanga sikhohlwe ukuthi laba abantu babuthakathaka njalo bayadinwa kumbe bagule kwesinye isikhathi.
Ungabona omunye wakho engezwa kuhle wena njengowesilisa sukuma umphekele hatshi ukuthi uzwakale ngokutshinga usithi kungani engakuwatshelanga amasokisi akho emsebenzini.
Mthande umuntu wakho, mphathe kuhle ngoba udalwe ngenyama laye njalo ulenhliziyo. Ungenzenje uzabona lihlala libobotheka endlini, abantwana labo bayalandela inyathelo lenu bakhule babe ngabantu abalothando.
