uMthunywa
Nkosilathi Sibanda
EZEMIDLALO kumele ziphakanyiswe esigabeni seNkayi, eMatabeleland North ukuze inengi labasakhulayo livikelwe ekusebenziseni izidakamizwa kulindawo, kutsho iNduna uDakamela.
Lokhu kuza ngesikhathi iNkayi, lezinye indawo kuleli ziphatheke kakubi ngokwanda kwabantwana abasebenzisa izidakamizwa lotshwala okwedlulisileyo.
Induna uDakamela yazise ukuba izasebenzelana lengatsha ezitshiyeneyo ukuthi ifeze umsebenzi wokunikeza intsha yakulindawo okokwenza lokukhuthaza ukuthi abantwana bakhwabithe ukuphatheka kwezemidlalo.
“Kusenhlelweni zethu ukuthi siphakamise isigaba sethu kwezemidlalo. Njengesigaba sihlele ukuthi ngokuya kwesikhathi sihlanganise amakhanda, sithole losekelo lokuthi sivuse imidlalo ethile kwelakithi.
“Sifuna abantwabethu basebenzise amathalenta abo ezemidlalo, bafeze amaphupho abo, okuyikho okuzaphakamisa lendawo yakithi. Intsha ifuna ukuphiwa amathuba, ngakho kumele kwenzakale. Sizakwenqabela ukuthi intsha ingahlali isenza okubi okuzaphazamisa impilo yabo,” kutsho iNduna uDakamela.
Lenhlanganiso yeSports and Recreation Commission (SRC) Matabeleland North ibika ukuthi izimisele ukuletha zonke inhlelo zokuvusa imidlalo phose kuzo zonke izigaba zeMatabeleland North.
Umqondisi weSRC eMatabeleland North uNewman Masuku uthe bakuthakazelela ukusukumela phezulu kweNduna uDakamela, izakhamizi, lazo zonke inkokheli zeNkayi lezisebenzi zikaHulumende ezifuna ukuphakamisa imidlalo.
“Siyakwamukela ukuthi iNduna uDakamela ifuna ukuthi kuvuselelwe, kusungulwa eminye imidlalo eNkayi. Ngumbono omuhle lo, okumele usekelwe ngumuntu wonke.
“Njengoba uHulumende egcizelela, akumelanga kube lomuntu kumbe indawo evalelwa phandle kwezengqubekela phambili. Ukuphakamisa imidlalo endaweni ezifana leNkayi, kuyingxenye yalokho. Sinanzelela ukuthi amanyathelo anje, alakho ukuthi aphakamise isigaba ngokuguqula indlela intsha eziphatha ngayo, okuzaletha impumelelo lokuthi abasakhulayo bagcine imizimba yabo, bakhule beqinile,” kutsho uMasuku.
UMasuku uthe sebeqalisile ukusungula imidlalo ebalisela i-boxing le-tug of war emaphandleni eMatabeleland North.
“Sikwenzile eBinga ngeviki edluleyo lapho esibise khona imincintiswano yemidlalo yenqindi lowe-tug of war. Sihlose ukuthi sisekele uHulumende lezifiso zenkokheli zomdabu ukuthi sincedise ukusukumisa ithalenta elilahlekileyo emakhaya.
“Ngokudonsa abasakhulayo kwezemidlalo, sifuna ukuthi babalekele impilo embi, yokuphatha izidakamizwa. Ucwaningo lusabalele, oluveza ukuthi nxa abantu bengaqina ngezemidlalo, bayenelisa ukuphila impilo engcono. Kubalulekile kwabasakhulayo ukuthi bazisondeze enkundleni njalo nxa inhlelo ezinje zingasekelwa kakuhle, ilizwe lizakuyaphambili kwezemidlalo.”
