uMthunywa
Ugwalo: Umfula Wezinyembezi olwalotshwa ngu Ezekiel Mkhize
Ophezulu Stinta
Ngeviki edluleyo sitshiye umkaMalandu eseyexoxisana lomphathisikolo ngohlupho lwabantwana bakhe ababengasafundi. Ngokuhamba kwenhlanhla umphathisikolo baxoxisana ngodaba lokusiza abantwana bakaMalandu lapho okwaphuma isinqumo sokuthi babezaqhubeka ngokufunda njalo befundiswa libandla.
Lesi yisigaba esihlangana laso empilweni lapho okufika khona usizo lethemba elitsha. Ziyesulwa izinyembezi zikaMaMoyo, ngokufanayo labantwana bakhe bafika labo esikhathini senjabulo lenhlasi yesibane lapho bekhangela ithemba elibhekane lekusasa yabo.
Kwathi lapho izikolo sezivulwa uDelimpilo kanye loSehlulizizwe labo babonakala beqonda esikolo njengabanye abantwana labo bejabulile, ingubo yokuba ngabantwana abahlukumezekile yembuleka kibo labo bazizwa befana labanye abantwana.
Abantwana laba bobabili babelamakhanda abukhali kwathi ithemu liphela betshaye isikolo basiphendulela ngale. Bazibamba esidukwini esikolo seManama lapha. Lokhu kwaba yimpendulo evele emazulwini kuMaMoyo ithemba lakhe laqina saka ukholo lwakhe eNkosini waluzwa laye lusiba
lempande ejulileyo, kwakuyimpendulo yomthandazo wakhe njalo lezinyembezi zakhe zasezesuliwe mpela. Kwathi nje ngenye imini uMaMoyo ezihlalele emthunzini wabona kuthutsha imota yomfundisi weManama. Uvalo lwamtshaya lwameqa-ke lapho ngoba wayengazi ukuthi pho wayeze lodaba bani lapha ekhaya. Wazama kodwa laye ukufihla ukwethuka kwakhe njengomuntu owayesehlangane lezinto ezibuhlungu empilweni yakhe ezazibuya ngenhlangothi zonke.
Wayengasakwazi ukuthi elilandelayo lalimphatheleni. Wezwa nje iphika lisehla lapho umfundisi esemazisa indaba ezimnandi. Wamazisa ukuthi wayevakatshele enkantolo lapho okwakuvalelwe khona umkakhe kanye loMasuku besiyalungisa ngelokuthi bake bavakatshelwe ngamalunga omdeni njengoba kwasekuphele iminyaka emihlanu bengazi imizi yabo, bengazi ngitsho labantwana babo.
UMaMoyo wezwa indaba ezijabulisa inhliziyo yakhe, kambe wayecine nini ukubona umyeni wakhe. Wehluleka ukuzibamba uMaMoyo wasiqhinqa isililo ngelithi kanti yena kuyini okungaka akwenzayo emhlabeni okumenza ahlangane lezehlakalo ezibuhlungu kangaka, walahlekelwa yingane umyeni wakhe laye wahamba walobela ejele.Ngempela kwakungumumo obuhlungu okwamagama. Umfundisi uyazama ukumduduza ngelithi angaboni impilo ngelihlo elibuhlungu, konke kusenhlelweni zikaMlimu.
