Innocent Kurira
UMQEQETSHI oligwala kumdlalo wenguqu uzwakala ngokuxhamanda, lokuveza obala inhloso yakhe phambi kokuthi adibane leqembu elikhulu.
Yikho okwenzakala ngomqeqetshi we-Arenel Movers uFarai Tawachera osevele wanikeza iqembu leHighlanders inkalakatha yenhlonipho, andubana zidibane zombili kumdlalo weCastle Lager ngeSonto.
“IHighlanders akusiqembu elilula ukudlala lalo, loba liqhula kumbe lisefomini. Sizabahlonipha njengabafowethu abadala. Badlala kuhle okwakhathesi njalo ibhola labo limnandi. Kumele singene enkundleni silungiselele,” kutsho uTawachera.
Lo ngumdlalo wakuqala phakathi kwamaqembu womabili.
Ngesikhathi ebuzwa ngenhloso ze-Arenel ngaphambi kokuthi kuqale isizini, umphathi weqembu, uJuma Phiri, wathi bafuna ukusinda ezembeni futhi mhlawumbe batshaye iHighlanders.
I-Arenel Movers ayikanqobi kumidlalo yayo emibili edluleyo.
Uthe akula okunengi angakwenza ukuthi akhuthaze abadlali bakhe ngaphandle kokubatshela ukuthi babophe ziqine.
“Okusuka kubenzima ngemidlalo yabomakhelwane enjengalo, yikuthi abadlali bayazana njalo ngabangane. Kumele sithole iqhinga lokuyigenqula iHighlanders. Ngiyaphinda njalo, akusoke kube lula.
“Akusoke kube yindaba enkulu ukuthi iHighlanders inqobe i-Arenel kodwa kuzaba semlonyeni yabantu nxa i-Arenel inganqoba iHighlanders. Singena emdlalweni sisazi ukuthi sikhangelelwe phansi, ngakho umdlalo lo akumelanga usitshayise ngovalo,” nguTawachera lo.
Kweminye imidlalo kulimpelaviki, iDynamos izabe ikoBulawayo ilande iChicken Inn ngoMgqibelo eBarbourfields.
Lo ngumdlalo omkhulu ngoba amaqembu la wonke adinga ukuthi athole imiklomelo yonke.
Uluhlu lwemidlalo ngeviki letshumi kuCastle Lager:
NgoMgqibelo: Bikita Minerals v TelOne (Sakubva), Ngezi Platinum Stars v Bulawayo Chiefs (Baobab), Chicken Inn v Dynamos (Barbourfields), Herentals v Yadah (Rufaro), Fc Platinum v GreenFuel (Mandava), ZPC Kariba v Manica Diamonds (Nyamhunga).
NgeSonto: Chegutu Pirates v Simba Bhora (Baobab), Caps United v Hwange (Rufaro), Arenel Movers v Highlanders (Barbourfields)
