uMthunywa
Innocent Kurira
OKWAKUQALA ngqa kuleli, inkezo yeligi ye-English Premier League elandelwa linengi labantu umhlaba wonke, izafika kuleli lamuhla.
Emcimbini wokwethula inkezo le, kuzabe kulosaziwayo kunguqu uPeter Ndlovu.
uPeter Ndlovu
Inkampani yamafutha ezimota, iCastrol, kubikwa yiyo ezaletha inkezo le edolobheni leHarare. Kubikwa njalo kuzakuba lomcimbi omkhulu ozahlanganisa osaziwayo kwezenguqu, endaweni ebizwa ngokuthi kuse-The Venue, e-Avondale, esigodlweni selizwe.
Phezulu kwalokho, inkampani yeCastrol izanikeza abantu abanqoba kumncintiswano wayo ithuba lokuthi babuke inkezo ye-English Premier League le, enkundleni yeBelgravia Sports Club eHarare.
Laba abathola ithuba leli, bazathi ukuthatha imifanekiso beyibambile, baphinde bazijabulise.
Inkampani yeCastrol ilembali ende yokusekela inguqu umhlaba wonke. Umzekeliso okhona ngowokusekela i-Fifa 2010 World Cup.
Umqondisi wezokuthengiselana kuCastrol, kuzwekazi le-Africa, uJennifer Heyes uthe bakhangelele ukuba lombuthano omuhle.
“Siyathaba ukuthi senelisa ukuphakamisa isisindo senkezo yePremier League, siphinde sithole injabulo yokuthi ifike eZimbabwe. Silohlelo olukhulu ngokufika kwenkezo le eZimbabwe, sihlanganisa lengcitshi zomdlalo ezake zadla ubhedu.
“ICastrol isekela imiklomelo embalwa kuPremier League, ebalisela iCastrol Golden Boot, lo ophiwa umdlali ohlohle amabhola amanengi, iCastrol Playmaker, ophiwa umdlali oncedise abanye ukuthi badlale kuhle. KuleCastrol Golden Glove Award ephiwa unozinti ovale ngci egedini.
“Ngomnyaka odluleyo, iGolden Boot yaphiwa uSon Heung-Min loMo Salah. IGolden Glove yahamba ku-Alisson loEderson. UMo Salah waphinda wathola lomklomelo we-Playmaker of the Season,” kutsho uHeyes.
UHeyes wengeze wathi: “Ukubhodiswa kwenkezo yePremier League emazweni angezansi yezwekazi le-Africa lokhu kuzanceda ekuthini sigqugquzele ukubukelwa komdlalo wokucina kuligi le, ozabe umhlaka 19 Nkwenkwezi.
