uMthunywa
Langelihle Moyo
KULENDODA yeBinga endaweni yeMangani esigabeni se-Siawandu eleminyaka engu-66, ehlala yodwa emzini wayo etholakale ithe bhazalala esizibeni segazi layo emzini wayo, endlini yokulala.
Kubikwa mhlaka 18 kuyonale inyanga uSondas Muleya owayevakatshele emzini ka-Ackim Kabudula Mukombwe, wasuka wabuyela emzini wakhe ngehola lesithupha ntambama watshiya uMukombwe yedwa emzini wakhe.
Kuvele ukuthi mhlaka 19 kuyonale inyanga ngehola lakuqala ebusuku umakhelwane kamuyi njalo engumzawakhe wezwa umsindo uvelela emzini kamuyi.
“Uthe esizwa umsindo lo wagijima wayabiza uMuleya bahamba bonke bayafika emzini kamuyi.
“Ekufikeni kwabo bathola umuyi ethe bhazalala phakathi kwesiziba segazi egomela, ngemva kokuba sebebone lesi siga bahle baphangisa batshayela amapholisa eBinga ucingo.
Lawo kawazange athatha isikhathi eside, abesethelekile.
Isikhulumi samapholisa eMatabeleland North uInspector Glory Banda uthe udaba lolu lwabikwa emapholiseni eBinga ahamba ayafika emzini kamuyi bexhasene lamapholisa awe-CID.
“Udaba lolu lwabikwa emapholiseni, njalo amapholisa ahamba ayafika emzini kamuyi ukuyaphenyisisa ngodaba lolu. Ekufikeni kwamapholisa kukhona okwatholakalayo emzini kamuyi.
“Amapholisa afika athola isidumbu sikamuyi siphakathi kwesiziba segazi kulamanxeba avulekileyo emahlombe, elinye inxeba kwesokunxele ekhanda lakhe lelinye inxeba futhi emlenzeni wesandleni sokudla. Kuphinde kwatholakala izigodo ezimbili zilegazi phandle kwendlu kamuyi yokulala.
“Bekukhanya kulamatshudutshudu asuka emzini aze ayofika lapho okutholakale khona isidumbu sakhe.
“Umzimba kamuyi wathwalwa wahanjiswa eMortuary ye-Binga Hospital simelele ukuya ku-Postmoterm e-United Bulawayo Hospitals koBulawayo, njalo amapholisa asachwayisisa ngokugcweleyo ngodaba lolu,” kuphetha uBanda.
