Zinkunzi eMagumeni

Nkosilathi Sibanda

KUCENTWA indlela kuqondwe kuzo zonke inkundla zomdlalo wenguqu kuligi yeCastle Lager ngempelaviki.

Imidlalo yokuvula isizini yalonyaka iqala ngoMgqibelo. Amaqembu akuligi ephakemeyo le abika ukuba aselungiselele ngokuqina nanko njalo lenhlanganiso yePremier Soccer League ithe konke kuqonde nta.

Isizungu ebesiphethe abathandi balumdlalo asisekho kukanti lamathimu aselinde ukuthi aphakulule ibhola elizathokozisa njengoba ethole isikhathi eside sokulolonga.

Kuyo yonke imidlalo evula isizini, omkhulu ngohlanganisa iHighlanders leDynamos eMagumeni.

UKudzai Bare isikhulumi sePSL, kungxoxo yakhe lentatheli yephephandaba likazulu, ukhuthaze abalandeli bomdlalo ukuthi bengavilaphi, bavukele ukuyagcwalisa inkundla.

Inkuthazo kaBare ize ngesikhathi abalandeli labathandi bomdlalo betshayele inhlanganiso yePSL ngokukhipha kwayo uluhlu lwemidlalo yalisizini ngokuphangisa.

“Sesifikile njalo esikhathini sokuthi sivule inkundla zethu, siqalise umdlalo. Yasuka yahlala. Yikho esingakutsho ngalesisikhathi njengoba wonke amathimu eselinde ukuvulwa kwesizini ka2024.”

Kusenjalo, abaqeqetshi bamaqembu akulumhlubulo welizwe, abavume ukukhuluma lentatheli bathe sebenze konke okusemandleni abo ukuthi balungiselele ukuncintisa.

Umqeqetshi weHwange uNation Dube uthe: “Ngingumqeqetshi ongathandi ukukhuluma okunengi. Engingakutsho yikuthi iHwange ingena isizini le ilokuzethemba njalo izadlalela ukunqoba kuphela.”

IChipangano izadlala leYadah Stars, iqembu eselithenge ingcitshi yomdlali uKhama Billiat.

UKelvin Kaindu oweHighlanders, ekhuluma kumabonakude weZimpapers Television Network (ZTN) ngoLwesibili emini, uthe ukhuthazwa yikuthi usephenduke eqenjini alaziyo njalo kuyamjabulisa ukuthi umdlalo wakhe wakuqala udibana lesitha esikhulu iDynamos.

“Sizamile ukuthi sibumbe iqembu eliqinileyo. Njengabaqeqetshi silungiselele ukuthi abadlali esilabo bazibonakalise enkundleni.

“Sidibana leDynamos kumdlalo wethu wakuqala, okungumdlalo omkhulu njalo ovuselela imbali phakathi kwamaqembu womabili.”

UJoey Antipas oweChicken Inn uthe ukudlala leqembu leCaps United kuzakuba ngumthwalo.

“Kuhle ukuthi siqale imidlalo yethu. Indlela esiqine ngayo izabonakala enkundleni ngempelaviki. Siyabathemba abadlali bethu ngoba sibakhethile, sabalolonga sikholelwa ukuthi yibo abazasinikeza impumela esiyifunayo. 

“Umdlalo wethu leCAPS United umkhulu. Ithimu esilayo lonyaka kumele inqobe kuyo yonke imidlalo. Iligi ilamathimu amanengi esidlala lawo, yikho ngisithi kusukela ngempelaviki kumele sinqobe,” nguAntipas lo.

Imidlalo
ngokugcweleyo:

NgoMgqibelo:

Herentals College v Zifa EASTERN Region Champions (wedluliselwe phambili), CAPS United v Chicken Inn (Inkundla izabikwa), Arenel Movers v Ngezi Platinum Stars (Luveve Stadium), FC Platinum v Chegutu Pirates (Mandava Stadium), ZPC Kariba v TelOne (Nyamhunga Stadium), Greenfuel v Bulawayo Chiefs (Greenfuel Arena)

NgeSonto:

Manica Diamonds v Simba Bhora (Sakubva Stadium), Highlanders v Dynamos (Barbourfields Stadium), Hwange v Yadah Stars (Colliery Stadium)