uMthunywa
Langelihle Moyo
ABABONA ngempilakahle yezifuyo abeVeterinary Services baxwayisa abafuye inkomo ukuthi bananzelele amahlanga adliwa yizifuyo ngalesisikhathi, njengoba sezingena emahlangeni nanko phela amanye amahlanga kawalungelanga ukudliwa yizifuyo.
UDokotela Maria Jakarasi uthe abalimi kumele baqaphele impande kumbe amahlanga ophoko ngoba akumelanga adliwe yizifuyo.
Amabele
“Ngithanda ukukhuthaza uzulu wonke olima uphoko kanye lamabele ukuba nxa esevunile uphoko kumbe amabele ahle agebhe amahlanga akhona aphume lempande zakhona awatshise kumbe enze umquba ngakho ukuze izifuyo zingakudli,” kutsho uDkt Jakarasi.
Uqhubekele phambili echasisa ukuthi amahlanga ophoko awabulali khonapho khonapho.
“Amahlanga lawa awabulali masinya, uyabona inkomo isigula ngemva kwesikhathi udinge uswele ukuthi ikhathazwa kuyini kanti yadla amahlanga la. Ngikhuthaza umuntu wonke olime uphoko lamabele, laloba ungafuyanga gebha iziqinti ukhuphe lamahlanga akhona emasimini akho ukuze izifuyo zabanye zingakudli ngoba lamuhla kungaba ngezomunye kodwa kusasa kungaba ngezakho,” kuphetha uDkt Jakarasi.
