uMthunywa
Nkosilathi Sibanda
INTSHA yedolobho leGwanda isikhuthazwe ukuthi isebenzise umdlalo wenguqu ukulwisana lobubi osebuhlasele lindawo, okubalisela ukusetshenziswa kwezidakamizwa.
Inkuthazo le ivele kumgcinisihlalo weqembu leGwanda Pirates uGuqukani Mpofu ngesikhathi ebika ngokuzimisela kweqembu labo ukuthi lizakuba yinsika yokuguqula impilo zabasakhulayo abalethalenta kunguqu esabelweni seMatabeleland South.
IGwanda Pirates esanda kusungulwa, itshengise izikipa zayo emphakathini ngempelaviki. Iziphathamandla zayo zifunge zagomela zathi zizafukula ithalenta, ziphinde zisize intsha iqale ukukholwa ukuthi ezemidlalo zingatshintsha impilo yazo kwelingcono.
“Ekusunguleni iqembu lethu, sigqugquzelwe luthando lomdlalo lokuthi sibeyingxenye ekuncediseni intsha yakulindawo ukuthi ilwisane lokusebenzisa izidakamizwa,” kutsho uMpofu.
Iqembu leli likhangelele ukuthi lincintise enkundleni zeligi yeZifa Matabeleland South Division Two.
Liqeqetshwa nguYolamu Ngwira, owake wadlalela iChrome Stars. Umqeqetshi lo uzancediswa nguMduduzi Maphosa loElias Tsabalaka.
UMpofu uthe bazasebenzisa inkundla yePelandaba Stadium.
“Inkundla yethu izakuba yiPelandaba Stadium kodwa ngokuya kwesikhathi sizatshitsha sisiyadlalela enkundleni zeGwanda Prison.
Ekhuluma ngesimo seqembu, uMpofu uthe basadinga usizo kokunye okubalisela usekelo lwemali ukuze bafeze amaphupho abadlali.
“Okwamanje sithenge i-kit. Sifuna ukuthi umdlalo lomdlali athole impahla eneleyo. Sicela usekelo njengeqembu elisahluma.”
Ezinye inkokheli eqenjini zibalisela uNkosiyabo Wenha, Tinashe Machokoto, Nkosilathi Moyo, Mthulisi Ncube, Dumolwenkosi Dube, Adrian Pabazhira, Sabelwesihle Dube, Josias Mabhena, Aibu Phiri, Minenhle Moyo loMishon Tsabalaka.
