Lovemore Dube
OGIJIMELA iNedbank Zimbabwe uProsper Mutwira uqhamuke kuqembu elihamba phambili ngemva kwebanga le-33km wanqoba ngendlela emangalisayo kuPPC Matopos 33-Miler ngeSonto ekuseni.
Uqede umango lo ngamahola amathathu lemizuzu eyisithupha. Isikhathi lesi singesinye sezinhle kakhulu azenelisayo. Wenze ngcono kulo-Innocent Chimbidzikai oweqeda ngamahola amathathu, imizuzu engu-12 lemizuzwana engu-37 ngomnyaka ka-2019.
“Ngihle ngafaka isiqubu ngabatshiya ngakhokhela sekusele i-20km. Ngithabe kakhulu ngokunqoba umjaho lo. Sengiphatheke kulumjaho kusukela ngo-2016,” kutsho uMutwira.
Kuhlandla labomama, kunqobe njalo elinye ilunga leNedbank Zimbabwe ku-33-Miler uChiedza Chokore ogijime amahola amathathu lemizuzu engu-45 elemizuzwana engu-46.
Ulandelwe nguRudo Mhonderwa oqede ngemva kwamahola amathathu lemizuzu engu-49. Umgijimi ovela eMutare uNeviah Maganzo ubengowesithathu ngamahola amathathu lemizuzu engu-51.
Kumahlandla womabili, abanqobi bathole imivuzo ye-US$2 000. Abaqede bekunombolo yesibili bathole i-US$1 300, kunombolo yesithathu kube yi-US$600.
Lalabo abagijima bekuma-wheelchair bathole imivuzo. Owokuqala ukutshaya intambo kuhlandla labesilisa kube nguMunyaradzi Katiyo of Tsvaira Club, onqobe kumbango we-21km ngehola lemizuzu eyisikhombisa. Kulandele uSamson Muroyiwa weZvishavane ngemva kwehola lemizuzu elitshumi lambili. Ogijimela iqembu leRichwood Paraplegic Club uMorleen N ubengowesithathu ngehola lemizuzu elitshumi lantathu.
Kwabesifazane kunqobe uStella Jongwe oqede ngehola lemizuzu engu-26, kwalandela uThandiwe ngehola lemizuzu engu-34. Endaweni yesithathu kubenguMorleen Muza ngehola lemizuzu engu-36.
