uMthunywa
Nkosilathi Sibanda
UMDLALO wethenisi edolobheni lakoBulawayo uzakuba lemncintiswano eminengi lonyaka, nanko sekuhlelwe oweBulawayo Open kunye leTarryn-Leigh De Souza, okukhangelelwe ukuthi ibekhona kulinyanga.
Imncintiswano yomibili ilandelwa oweMakhandeni Invitational, owaba ngowokuqala ukuvula isizini yalonyaka.
Kowokuqala ohlelweni yiBulawayo Open ozaqhutshwa mhlaka 4 Mabasa kusiyafika umhlaka 7. Imidlalo yeTarryn-Leigh De Souza izalandela mhlaka 7 kusiya ku-10 ngenyanga yonale.
Omunye wamalunga enhlanganiso yeBulawayo Metropolitan Tennis Board, uThesly Mufunda utshele iZimpapers Sports Hub ukuthi yomibili imiqhudelwano ivumela bonke abadlali abavela kuzo zonke indawo kuleli.
“Silemncintiswano emibili kulinyanga, oweBulawayo Open leTarryn-Leigh De Souza. Abadlali bethu bazakholisa ukuthola amathuba amanengi wokuncintisa kusukela khathesi umnyaka uze uyephela. Kungumbono lenjongo yethu ukuthi siphathise kakhulu njengeBulawayo Metropolitan Tennis Board ekuthuthukiseni bonke abadlali bethenisi. Ukuze sifeze lokhu, kumele siqoqe imncintiswano. Sizimisele kulokho.
“Ngemva kwemidlalo le, abadlali bazaphatheka kuMidlands Open, Harare Open kunye leManicaland Open,” kutsho uMufunda.
Uthe njengabaphathi bethenisi edolobheni lakoBulawayo bayaziqhenya ngokuthi abadlali babo abasakhulayo baqhubeka besenza kuhle emiqhudelwaneni yezwekazi le-Africa.
“Kumaviki amabili adluleyo sibukele abadlali bencintisa kumqhudelwano weMakhandeni Tennis Club Invitational. Sibabonile abasakhulayo bethu besenza kuhle kakhulu lasemncintiswaneni yamazwe ku-Africa Junior Championships. Sibone indlela uKuzivaishe Chapepa adlale ngayo njengoba eqede endaweni yesine kumncintiswano we-Africa Junior Championships.Kuhle akwezileyo.”
Njengoba iBulawayo Metropolitan Tennis Board ilungiselela imidlalo le, iTennis Zimbabwe (TZ) isimemezele ukuthi izakwethula uhlelo lweJunior Tennis Initiative olukhangela abadlali abasacathula ngesikhathi sekhefu lezikolo.
Umqondisi waloluhlelo uLinsent Chitiyo utshele iZimpapers Sport ukuthi bafuna ukufinyelela indawo ezinengi.
“Loba kanjani sizasekela abasakhulayo kuthenisi, abaphatheka emncintiswaneni. Yikho lapho abadlali abeqeqetshwa khona, befunda umdlalo ngendlela eyiyo.”
