uMthunywa
Lovemore Dube
OWAKE wabangumdlali wodumo uTobias Mudyambanje usexwayise abamaqembu enguqu ukuthi bajike amambule kabanzi ukuze bathole abadlali abanengi.
Ukhulume lokhu kumbuthano weNduna uZibuyeni, Empandeni esigabeni seMangwe eMatabeleland South ngeviki eledluleyo. Embuthanweni lo kuqhutshwe lomdlalo wenguqu lapho amaqembu ancintisane khona kuthokoziswa uzulu akade ethe gwaqa.
Ngemva kwemidlalo, uMudyambanje uchaze ngethalenta alibonileyo.
Utshele intatheli yeZimpapers Sports Hub ukuthi usuthisekile ngakubone eMangwe. Uthe abantwana bakulindawo balesiphiwo sokudlala inguqu ngakho badinga ukusekelwa.
Ingcitshi yebhola lenyawo le ithe kulusizi ukuthi abantwana laba baswela abaqeqetshi abavela emadolobheni bezojika amehlo babone abangcono bahambe labo, abalobuciko abangabanikeza amathuba angcono.
“Ngijabulile kakhulu ngengikubonileyo. Bayadlala abantwana. Kuhle njalo kuyakhanya mhlophe nje ukuthi nxa bengathathwa bebancane, balolongwe, bengaphakamisa isigaba lelizwe.
“Okungekhoyo nje ngabantu abangavakatshela emakhaya baphathise ngokubasusa lapha. Ngithi ibhola lenyawo kalisukume Empandeni,” nguMudyambanje lo.
UMudyambanje udlalele iqembu le-Olympics esakhula. Ngomnyaka ka1986 wadlalela iHighlanders lapho aphathisa leliqembu ukuthi laziwe njengengqwele zenkezo.
Kwakungadluli imidlalo emithathu engathelanga emambuleni uMudyambanje.
Amaqembu aphiwe ama-kit amatsha nguWakhumuzi Moyo, odabuka kulindawo, osebenza eNgilandi.
Isigaba lesi sesikhiphe abantwana abambalwa asebedlale ibhola kumaqembu amakhulu kuleli laphetsheya.
KuloPaul Moyo obalelwa kubaqeqetshi baphezulu kuleli, owasebenza kumaqembu abalisela eleHwange leZisco. Uphinde njalo waqeqetsha leqembu lesizwe.
Umntanakhe uBenedict wadlalela iZisco leZimbabwe kuthi uBlessing, Benjamin loBryan badlala kumaqembu ambalwa kuleli.
UBenjamin wabangumqeqetshi kuMazulu, Chapungu leHighlanders, waphinda wasebenza kweleBotswana leSwatini.
UBlessing ungumsekeli womqeqeshi weqembu leJwaneng Galaxy eBotswana ebelidlala kuAfrica Champions League.
UWakhumuzi uthe: “Kungithokozisile ukubona abantu besigaba behlangene bephakamisa uMlisa uMisheck Ncube. Lokhu ngikwenzele yena ngoba nguye osiphathisa ekugcineni amasiko ethu. Ngithe labatsha ithuba lokuthi babukwe ngabavakatshi abanjengoTobias Mudyambanje ukuze laye abakhuthaze.”
