Uncategorized

Umsekeli kamphathi ubhaxabula umphathi lababalisi abaqamule

18 Apr, 2024 - 00:04 0 Views
Umsekeli kamphathi ubhaxabula umphathi lababalisi abaqamule

uMthunywa

Ethel Ncube

KULOMSEKELI kamphathisikolo esikolo se-Amazon Christian College, eFilabusi odingwa ngamapholisa kulandela ukuhlasela umphathi, umkakhe kanye lombalisi, esala ukusayina isixwayiso esibhaliweyo ngokungaziphathi emsebenzini, uMthunywa uyakuveza lokhu lamhlanje.

Kubikwa uVusa Ncube obengumsekeli kamphathisikolo, uhlasele umphathi lababalisi laba ababili, abalwela impilo zabo esibhedlela seFilabusi District Hospital kuthi umphathi udluliselwe esibhedlela se-United Bulawayo Hospitals (UBH).

Omunye umfakazi oqotho oyisakhamuzi uMnumzana Joel Dube ubike ukuba umphathisikolo usesimeni esibi kakhulu.

“UProgress Ncube onguPrincipal wekolitshi le, wabiza umsekeli wakhe ukuba azosayina incwadi eyayimxwayisa ngesenzo esithile, elomunye umbalisi uSimangaliso Jamela ukuba abe ngumfakazi.

“UVusa wafika wala wemba phansi ukusayina wasuka waya ehofisini yakhe wafika wadobha i-cricket bat wayangena ehofisini kamphathi engasadlanga nkotshana, wafika wambhaxabula ngayo, uthe eqeda lapho wangenela uJamela, uthe ezama ukulamula, uNcube wabemphinda futhi umphathi, waze wawela phansi eselimele kabuhlungu,” kubika uMnu Dube.

Uqhubekele phambili eveza ukuba umka-mphathi esizwa umsindo laye waqonda ehofisini kanti laye seziqalele okunye. 

United Bulawayo Hospitals

“Umkamphathi laye ofundisa kule ikolitshi wathi esizwa umsindo wagijima esiyakhangela umsekeli wahle waphendukela ngakuye wamtshaya ekhanda walimala lekhanda.

“Kusenzakala isiphithiphithi abathathu laba bethwalelwa esibhedlela uVusa wahle wangena emoteni yakhe wabaleka kaziwa lapho akhona, uyadingwa. Kubi ngoba umphathi ulimele, ulwela impilo yakhe koBulawayo ngento ebingalungiswa nje ngomlomo. UMartha Ncube loSimangaliso Jamela balalisiwe esibhedlela seFilabusi ngemva kokwephuka ingalo bobabili,” kubika uMnu Dube.

Intatheli ixhumane lesikhulumi samapholisa eMatabeleland South uInspector Loveness Mangena obike ukuba udaba olunjalo lufikile kuye.

“Indaba le isezandleni zamapholisa sicela uzulu ongabe esazi lapho okuloVusa Ncube khona abikele amapholisa aseduzane laye ukuze abotshwe.

“Njengamapholisa, silesixwayiso sinye ukuthi nxa kulokungazwani abantu kabahlale phansi bazame ukuxazulula kuhle ingxabano kulokusebenzisa udlame,” kuphetha uInsp Mangena.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds