uMthunywa
Ethel Ncube
ABADALA babeqinisile nxa bethi inkukhu inatha amaqanda ayo nanko kulendoda yakoGutu etshiye izakhamizi zitshe amathe kulandela ukuvela kwensolo zokudlwengula indodakazi yayo inyanga ezintathu, uMthunywa ukuzwile lokhu.
Indoda le eleminyaka engu-54 imiswe emthethwandaba ngeviki ephelileyo eMasvingo isetheswa icala lokudlwengula indodakazi yayo eleminyaka engu-17.
Umtshutshisi kulelicala uMnumzana Innocent Mudzingwa ubike ukuba umsolwa wadlwengula umamangala amahlandla amathathu ngezikhathi ezitshiyeneyo.
Kubikwa ngesikhathi kusenzakala lokhu, unina womntwana wayevakatshele kweleSouth Afica ngomnyaka ophelileyo.
Kuvele ukuba umamangala wayesele loyise kunye labanawakhe kusenzakala lokhu.
Inkundla izwe ukuthi ngenyanga kaNcwabakazi umamangala wathi elele exhibeni lakhe uyise wangena wafika wamphulula, loba umntwana wahlaba umkhosi uyise waphanga wamthembisa ukumbulala nxa angaqhubeka ebanga umsindo, waqhubeka wamdlwengula kanye.
Njengenja ethi ingaqhoba ithambo iyajayela umsolwa waqhubeka esenza ihlazo leli inyanga zaze zaba ntathu kuze kwavela ngemva kokuba umamangala esexoxele abanye akhonza labo okwadala ukuthi umsolwa abizwe ngabebandla bemkhuza ngesenzo sakhe lesi.
Kubikwa umsolwa waphika wemba phansi kodwa uthe efika ngekhaya wabhaxabula umamangala okwenza wabaleka waya kuyisekazi okwadala ukuba ayemangalelwa emapholiseni wasebotshwa.
Umantshi uMnumzana Bishard Chineka uthe umsolwa uzabe evalelwe ejele elindele ukuphenduka njalo.
