uMthunywa
Ethel Ncube
KULEJAHA lakoBulawayo elihlabela umculo wezokholo eliqhunsa liseSouth Africa eseliveze ukuba selipheka elinye idlalade lengoma zokholo elizaphuma ensukwini ezizayo.
U-Ozious Oscar Gumbo uveze ukuba usekelo alutholayo kuzulu yilo olumnika idlabuzane lokuqhubeka ehlabela ngaso sonke isikhathi.
Ekhuluma loMthunywa uOzious owazakala ngokuthi nguGatsheni kwezomculo ubike ukuba kalasikhathi eside ehlabela kodwa umculo wakhe uyananzelelwa ngabantu.
“Ngiqale ukuhlabela ngomnyaka ka2021 lapho engakhupha khona idlalade elithi Jabula moya wami elilengoma ezingu-8 kuze elinye elesibili elithi Jabula Moya wami 2 elilengoma ezingu-12 engalikhupha ngo2022 kuthi-ke ama-collections ngile-13. Kungoma zami ngilenye ingoma ethi: “UJonah eyaba yi-Song of the Year kumsakazo weMzansi.
“Senginanzelele ukuba abalandeli bami bayawuthakazelela umculo kungakho ngiledlalade lami engiphezu kwalo elithi Vumicala, ngizalikhupha maduzane nje ngisaqedisa okuncane kilo,” kutsho uGatsheni.
Uqhubekele phambili eveza ukuba ubonga abalandeli bakhe.
“Ukuhlala abantu bekweseka kwenza ube lomdladla wokuqina njalo uqhubeke ulokhe ubambelele usiyaphambili ngomculo we-gospel. Ngiyabonga kuwo wonke uzulu olandela umsebenzi wami wezingoma ngithi asikholiseni siphinde siduduzeke engomeni zokholo,” kuphetha uGatsheni.
