uMthunywa
Nobuhle Mgwaqo
LIZAKHALA izembe esibhedlela se-United Bulawayo Hospitals (UBH) kubukhokheli ngokufaka impilo zezigulane engozini, nanko phela sokuvele ukuba kulokutshontshwa kwemithi eqakathekileyo.
UMsekeli kaMphathintambo wogatsha olubona ngezeMpilakahle kunye lokondliwa kuhle kwabantwana, uSleiman Kwidini uthe esibhedlela se-UBH kulezisebenzi ezilomkhuba wokutshontsha imithi yezigulane eyabe ithengwe nguHulumende ngenhloso yokugcwalisa izikhwama zazo.
Uveze lokhu ekhuluma lentathelizindaba ngemva kokubhoda edingisisa ngokusebenza esibhedlela seUBH izolo.
Uthe ubukhokheli besibhedlela lesi buthathela impilo zabantu phansi ngokungenzi umsebenzi wabo ngobuqotho. Uthe ngenxa yobugwelegwele lobu, izigulane ziqhubeka zibhalelwa ukuthi ziyethenga imithi yona ikhona esibhedlela njalo eminye yakhona isize yadlulelwa yisikhathi sokuthi isetshenziswe.
“Sivakatshele lapha ukuze sizodingisisa sizibonele ukuze nxa sekusenziwa izinqumo sibe silobufakazi. Kulabantu abasipha imbiko engaqondanga okwenza nxa uHulumende esenza inhlelo zakhe ahlele esebenzisa imbiko engayisiyo.
“Kulobunzima lapha esibhedlela se-UBH. Kulabantu abathatha impilo zezigulale lula. Kabenzi umsebenzi wabo.
“Ekhemisi yesibhedlela kumele kube kugcwele imithi kodwa akulamithi, okuyibufakazi bokuthi ukhona olala emsebenzini. Sidlule eNatPharm imithi igcwele ilinde izibhedlela lezi ukuthi ziyeyidinga,” kutsho uMsekeli kaMphathintambo uKwidini.
Kuvele ukuba kunengi okutshaya amanzi ekusebenzeni kwabaphathi besibhedlela lesi abakhokhelwa nguChief Medical Officer, uDokotela William Busumani obengekho emhlanganweni lo kunye lomele u-Operations manager.
Kubikwa kulezisebenzi ezintathu zesibhedlela lesi ezimiswe umsebenzi njalo kwaziwa ngabaphathi laba kuphela abanye kabazi lutho.
“Abaphathi abaphezulu bamise u-chief phamarcist uDokotela Juliet Kumirai kunye labongikazi ababili ngaphandle kwenqubo ngoba sesizamile ukubuza abanye kodwa kukhanya kabalalwazi ngakho.
Uthe kuzakuba lokugedla kwamazinyo ngoba kabakukhangelelanga ezisebenzini zomphakathi.
“Izembe lizakhala, kasikukhangelelanga lokhu kuzisebenzi zikaHulumende. Kunengi okungahambi kuhle kunye lokungaphathwa kuhle komsebenzi.
“Abantu laba babisela emuva imizamo kaHulumende. Izisebenzi ze-UBH zizikhangela zona kazilandaba lempilakahle yezigulani ezilapho yikho besenza ubugwelegwele bonke lobu. Kumele sikuqede konke lokhu,” kuphetha uMsekeli kaMphathintambo uKwidini.
