uMthunywa
KAYIPHIKI eyokufuna ukubuyisa uKhama Billiat umqeqetshi weMamelodi Sundowns, uPitso Mosimane, uyitsho kamnandi indaba yokukhumbula lumdlali oqale kuKaizer Chiefs ekuqaleni kwesizini edlule.
Ngeviki edluleyo kusabalele izindaba zokuthi iSundowns izimisele ngokubuyisa uBilliat osedlale isizini eyodwa elilunga leNaturena esuka kumaBrazilians kulandela ukuloba ukuvuselela isivumelwano sokudlala.
UMosimane uyaziwa ukuthi uyazifela ngoBilliat futhi ubalise ngesikhathi lumdlali enqaba ukuhlala eChloorkop emva kokuphelelwa yisivumelwano sokudlala ekupheleni kwesizini ka-2017/2018. Kuvele ukuthi iSundowns isibeke izigidi ukudoba uBilliat okungamenza umdlali ohola ukubedlula bonke ku-Absa Premiership.
“Kufanele ngiqaphele kulolu daba. Kufanele ngiyihloniphe iKaizer Chiefs, iyiqembu elikhulu. Iligi izongihlawulisa uma bekhononda kuyona. Bazongihlawulisa ngokunyonyobela abadlali ngoba ungumdlali weKaizer Chiefs.
“Kufanele ngikuhloniphe lokho. Nxa sifuna uKhama okufanele sikwenze yikukhuluma leKaizer Chiefs, amaqembu axoxe wodwa. Bazatsho ukuthi bangamthengisa loba hatshi,” kutsho uMosimane.
Ngaphandle kweSundowns, kuthiwa uBilliat ufunwa ngamaqembu amakhulu asenhla le-Afrika okukhona kuwona izinkunzi zase-Egypt i-Al Ahly leZamalek. Umqeqetshi weChiefs — Ernst Middendorp, ukucacisile ngesonto eledlule ukuthi akafuni ukulahlekelwa nguBilliat.
“Angikaze ngitshelwe ngokufunakala kuka Khama Billiat, njalo akulandlela engingapha ngayo iqembu lobucwephetshe imvumo yokuthi bayekele umdlali lo ahambe kumbe abanye abadlali,” kutsho umqeqetshi uErnst Middendorp umqeqetshi weKaizer Chiefs. — Ubulembu
