uMthunywa
Langelihle Moyo
KULEMULI ezimbili zeGweru ezilokhu zisakhakhamele ngemva kokunikwa izidumbu ezingayisizo zamalunga emuli zabo ukuthi ziyengcwaba. Lokhu kuvele enye yezimuli lezi isingcwabile.
Kubikwa izidumbu ezaxubaniswayo zazingezamajaha asakhula ahlaselwa suku lunye eGweru kodwa endaweni ezehlukeneyo.
UCourage Sibanda oleminyaka engu-19, weNgamo eGweru wahlaselwa ngabantu mhlaka 4 Mpalakazi ekuseni kukanti uTakudzwa Chipadza laye oleminyaka engu-19 wahlaselwa ngosuku olufanayo ngezikhathi zantambama.
Kubikwa izidumbu zababili laba zathwalelwa emotsha yesibhedlela seGweru.
Kubikwa mhlaka 6 izihlobo zikamuyi uTakudzwa Chipadza zahamba emotsha sezisiyathatha isidumbu ngephutha zanikwa esikaCourage Sibanda. Bahamba bayasingcwaba mhlaka 7 kuyonale inyanga emangcwabeni eMutasa Cemetery eGweru.
Kuthe mhlaka 7 Mpalakazi izihlobo zikaCourage Sibanda sezisiyathatha isidumbu zafica esikaTakudzwa bayasingcwaba eSomabhula, kuthe ngosuku olulandelayo sebelungiselela umngcwabo, ngesikhathi sokumvalelisa (body viewing) ubaba kamufi waphangisa wananzelela ukuthi akusuye umntanakhe osebhokisini.
Kubikwa imuli le yazisa abesibhedlela andubana kuyegejwa isidumbu sikaCourage Sibanda mhlaka 14 Mpalakazi njalo zonke zabekwa mhlaka 15 Mpalakazi.
Isikhulumi samapholisa eNkabazwe uInspector Emmanuel Mahoko, uthe abantu nxa betshiywe yizihlobo zabo kumele bakhangelisise izihlobo zabo bengakazithathi.
“Singamapholisa sithanda ukuxwayisa uzulu ukuthi nxa lifelwe, nxa selisiyathatha izidumbu likhangelisise libe lesiqiniseko sokuthi lithethe umzimba oyiwo.
“Lokhu kwenzelwa ukuthi kungabi lephutha lokutshintshwa kwezidumbu,” kuphetha uInsp Mahoko.
