uMthunywa
Ethel Ncube
ABALIMI bendaweni zonke zelizwe sebekhuthazwe ukuthi bafuye imbuzi ngoba kulibhizimusi elilenzuzo enhle kakhulu.
Omunye umlimisi we-Agritex esigabeni seLupane esabelweni seMatabeleland North uMnumzana Sabelo Sibanda uthe abalimi kabasukumele phezulu ekufuyeni imihlobo etshiyeneyo yembuzi zokuthengisa.
“Balimi zamani ukufuya imbuzi, kazilamsebenzi omnengi njalo kazihluphi ngitsho. Kulomhlobo wembuzi okuthiwa yi-boer ezivela eSouth Africa kumbe eNamibia imbuzi lezi ungazifuya ulakho ukuphila ngazo,” kutsho umlimisi uSibanda.
Uqhubekele phambili echaza ukuba ibhizimusi yokufuya imbuzi ayidingi imali enengi.
“Liyenelisa ukuba liqembu litshaye imali elizikwanisayo lilungise amaphepha enu lithenge imbuzi zomhlobo wama –boer lizifuye. Ngomnyaka imbuzi eyodwa iyazala kabili njalo izikhathi ezinengi zizala amazinyane amabili kuthi nxa usuyithengisa ilakho ukuthengwa nge-US$500 eyodwa.
UMnu Sibanda uphethe ngokuxwayisa abalimi ukuthi imbuzi lezi nxa zigcineke kuhle umlimi ulakho ukuziphilisa lemuli yakhe ngokufuya nje kuphela.
