Lungiselelani izifuyo ngesikhathi somqando

11 Apr, 2024 - 00:04 0 Views
Lungiselelani izifuyo ngesikhathi somqando

uMthunywa

Langelihle Moyo

ABABONA ngokufuywa kwenkomo zochago elizweni sebekhuthaze abalimi abafuyileyo ukuthi balungiselele isikhathi somqando ukuze bangalahlekelwa yizifuyo zabo ikakhulu amathole ngesikhathi lesi esizayo.

UMnumzana Cosmas Muzunde onguLivestock Production Specialist esabelweni seMatabeleland North uthe isikhathi somqando sidinga ukulungiselelwa ukuze ofuyileyo engacini eselahlekelwa yizifuyo zakhe. 

“Isikhathi somqando sidinga ukulungiselelwa, umfuyi engakwenza lokhu ngokwakha imiduli emaceleni ezibaya zenkomo ngoba akumelanga izibaya zingene umoya. 

“Lesi yiso njalo isikhathi sokuthi umfuyi asike utshani azabendlala phansi esibayeni ngesikhathi somqando ukuze avikele amathole akhe emqandweni wesamende ngesikhathi somqando,” kulandisa uMnu Muzinde.

Uthe nxa kugodola inkomo ziyabe zifuna ukudla okunengi.

“Inkomo zidinga ukudla okunengi futhi okwakha umzimba. Amathole kudingeka ukuba umfuyi awanike isilinganiso sochago loba esokudla esiphindwe kabili nxa kugodola,” kuchasisa uMnu Muzunde.

Uqhubekele phambili echaza ukuthi abafuyileyo kumele bahlale bevakatshela abeVeterinary Services bedinga imithi yokuvikela izifuyo emikhuhlaneni okumele bayisebenzise ngesikhathi somqando.

“Ngikhuthaza abafuyileyo ukuthi bahambe eVeterinary Services bayethengiselwa umuthi wokuncedisa izifuyo zabo ku-cold stress ikakhulu bangabona izifuyo zabo zisehluleka ukuhamba loba zitshona zihlezi. Lokhu kuyabe kusitsho ukuthi isifuyo sesihlaselwe ngumkhuhlane we-cold stress,” kutsho uMnu Muzunde.

Ucine ngokuchaza ukuthi inkomo zochago zidinga ukuphathwa ngobunono ukuze umfuyi engalahlekelwa yinzuzo yakhe.

“Inkomo zochago zidinga ukuhlala zikhangelwa njalo nje ikakhulu nxa zithe zalimala umfuyi kumele abone ukuthi isilonda leso uyaselapha size siphole.

“Kuqakathekile ukuthi umfuyi abone ukuba akula mkhaza ohlasela inkomo zakhe. Lokhu angakwenza ngokuhlala efafaza inkomo zakhe ngomuthi ovikela imikhaza,” kuphetha uMnu Muzunde.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds