uMthunywa
Langelihle Moyo
INHLANGANISO yeVeterinary Services isikhuthaze abafuyileyo kundawana zonke zelizwe ukuthi baqaphele umkhuhlane wamehlo obizwa ngokuthi yi-opathalmia pink eye, othelelwanayo phakathi kwezifuyo ezigoqela inkomo, imbuzi lezimvu.
Ingcitshi kumpilakahle yezifuyo eVeterinary Services, uDokotela Maria Jakarasi uthe abafuyi kabaqaphele umkhuhlane we-opathalmia, ohlasela amehlo ezifuyo.
“Umkhuhlane we-opathalmia uyathelelwana ezifuyweni ezibalisa inkomo, imbuzi kunye lezimvu. Umkhuhlane lo uhlasela amehlo njalo uwenza abebomvu. Nxa isifuyo sesihlaselwe ngumkhuhlane lo sibonakala ngelihlo elihlala likhala njalonje futhi libomvu.
“Umkhuhlane lo ubangelwa ligcikwane le-thelazia rhodesic predisposes. Okwenza igcikwane leli lihlasele isibaya somlimi yikuminyana, uthuli kunye lokutshisa, njalo umkhuhlane lo wenza amehlo ezifuyo abebuhlungu, lokhu kuhle kwenze izifuyo zingathandi ukukhanya.
“Umkhuhlane lo umemethekiswa zimpukane.,” kuchasisa uDkt Jakarasi.Ubuye wachasisa ngendlela sokwenqabela ukumemetheka komkhuhlane lo lendlela zokuwulwisa nxa usungene esibayeni sakho.
“Ukwelapha umkhuhlane lo kumele kusetshenziswe i-eye powder ebizwa ngokuthi yi-tetracycline efakwa nsuku zonke lejekiseni. Ngakho ke abalimi kumele balimuke impukane zingamemethekisi umkhuhlane lo,” kuphetha uDkt uJakarasi
