uMthunywa
Langelihle Moyo
INHLANGANISO yeAgritex isixwayise abalimi ngendlela yokulima ama-cucumber elakho ukubenza bazitshayele imali enhle.
UNkosazana Treggy Mpofu ongu-Horticutulture Specialist koBulawayo kunhlanganiso le uthe abalimi abalesifiso sokulima ama-cucumber balakho ukuzitshayela inala nxa bangalandela izixwayiso ababapha zona.
Uthe kuhekitha, umlimi udinga nje i-2,5kg loba i-3,75kg yenhlanyelo.
“Umlimi kufanele ananzelele indawo lapho afisa ukuhlanyela khona isilimo sakhe ukuze isilimo sakhe senelise ukwenza kuhle. Nxa ama-cucumber ehlanyelwa kumele imifolo itshiyelane isibanga se-1,2 kusiya ku-1,8 cm kukanti phakathi laphakathi komfolo kumele kube yi-0,6 kusiya ku-1,2cm.
“Besokusithi nxa kuhlanyelwa ku-Greenhouse kufanele ehlukanise umfolo nge 0,3 kusiya ku-0,45cm besekusithi phakathi laphakathi komfolo kube yi-1,2 kusiya ku- 1,5cm,” kuchasisa uNkszn Mpofu
Eqhubekela phambili, uveze ukuthi ohlanyela emasimini engasebenzisa indlela ebizwa ngokuthi yi-farrow elomfolo owodwa ngoba lokhu kwenza kubelula ukunakekela isilimo lesi lokusithelela. Uthinte njalo ukuthi ukuthelela kubalulekile kakhulu nxa ama-cucumber esehlanyeliwe. Uthe isilimo esilinywe emasimini singathelelwa ngokusebenzisa i-drip system.
“Okunye okubalulekileyo yikuthi isilimo lesi kumele sibotshelwe izihlahla zaso ezigodweni ukuze singaze sathinta phansi. Ukuze isilimo lesi senze kuhle, umlimi kumele akhuthalele njalo ukusifaka umquba, kungaba ngowamabhiza, owenkomo kunye lowembuzi,” kutsho uNkszn Mpofu
Uchaze njalo ngemikhuhlane engahlasela isilimo lesi sama-cucumber lokuthi imikhuhlane le ingelatshwa njani.
“Isilimo lesi singahlaselwa yimikhuhlane enjenge-Fisari wilt, Antharacnose, Powdery mildew kanye le-cucumber mosaic ehlasela.
“Imikhuhlane le ingelatshwa ngemithi yezibungu kumbe ukuhlanyela isilimo sehanyanisi ngoba iyabulala izibungu,” kuphetha uNkszn Mpofu
