uMthunywa
Langelihle Moyo
INHLANGANISO ye-Agritex isikhuthaze abalimi lezakhamizi ukuthi bavule ama-fire guards ukuze bavikele imililo yendle evame ngalesi isikhathi njalo elakho ukutshabalalisa amadlelo ezifuyo.
Ingcitshi kwezokulima lokufuya, umqondisi kunhlanganiso le uMnumzana Dumisani Mbikwa Nyoni, ukhuthaze abalimi abafuyileyo kunye lezakhamizi kundawana zonke zelizwe ukuthi kabavule imikhandlo emingceleni yamapulazi abo loba ama-plot ngoba khathesi sokuyisikhathi esinzima lapho okuba lemililo eminengi etshabalalisa utshani, izifuyo lenyamazana.
Uthe ukuvula ama-fire guards kungaphathisa ukuthi imililo ingasabalali indawo enkulu.
Agritex
“Abalimi kabavule ama-fire guards emingceleni yamapulazi abo loba ekucineni kwamasimu ukuze bavikele ukusabalala kwemililo engaqhamuka ngoba khathesi sokuyisikhathi lapho osokuzaqalisa ukuba lomoya njalo yikho lapho okumemetheka imililo yendle eminengi.
“Ukwenza ama-fire guards kuzasiza abalimi ukuthi balondoloze utshani obusemadlelweni kunye lobunye ababuqumayo besenzela ukudla kwezifuyo zabo. Lokhu kuyanceda njalo ekuvikeleni inyamazana lezinanakazana ukuthi zingatshi ngemililo le ememethekayo,” kulandisa uMnu Nyoni.
Abalimi bangancedakala kakhulu ukuthi ngokuhlalisana kwabo njengezigaba benze izifundo zokucitsha umlilo.
“Okunye abalimi abangakwenza yikwenza izifundo zokucitsha umlilo ukuze nxa usuthe waqhamuka babe belolwazi lokuthi ucitshwa njani,” kuphetha uMnu Nyoni.
