uMthunywa
Langelihle Moyo
INHLANGANISO ebona ngezokulima eye-Agritex ixwayisa abalimi ukuthi basike utshani bezifuyo babugcine kuhle ngoba yiyo kuphela indlela engabasiza ukuthi bangadubeki ngokuthenga ukudla kwezifuyo ngesikhathi sebusika.
Ingcitshi kwezokulima lokufuya kunhlanganiso le esabalweni se-Matabeleland North, uMnumzana Dumisani Mbikwa Nyoni, uthe abalimi kumele basebenzise ithuba leli basike utshani bona lobu obulutshanwe obuhlumeleyo ngesikhathi sezulu lonaleli elilutshwana elinileyo.
“Nginanzelela ukuthi lonyaka izulu alinanga ngendlela ejwayelekileyo, lasemadlelweni akuhlumanga kuhle. Ngakho-ke ngikhuthaza abafuyileyo ukuthi basike utshani bona lobu obulutshwana babugcine kuhle ukwenzela ukuthi izifuyo zithole ukudla ebusika kusiyafika isigaba sokuna kwezulu esizayo,” kutsho uMnu Nyoni.
“Izifuyo kumele zithole ukudla okwaneleyo ukuze zingacubi,” kulandisa uMnu Nyoni.
Uqhubekele phambili esithi nxa utshani bungaphela emadlelweni abalimi baqalise ukunika izifuyo zabo utshani abayabe bebusikile babugcina.
“Abalimi nxa bangasikela izifuyo zabo utshani khathesi kuzabaphathisa kakhulu ngoba ngeke balahlekelwe yizifuyo zabo nxa zingaqhubeka zithola ukudla ngesikhathi esiqondileyo.
“Abalimi sibaxwayisa njalo ukuthi babuthe amahlanga lamakhasi amazambane bakugcine ngoba yikudla okuhle kakhulu kuzifuyo zabo.
“Kuminyaka edluleyo abalimi bebelahlekelwa yizifuyo ezinengi ngenxa yokucuba kodwa lonyaka ngoba sebelolwazi ngabangakwenza ukuvikela inkomo ekucubeni kasikhangelelanga ukuthi balahlekelwe.
“Kungakho-ke sikhuthaza abalimi kundawana zonke ukuthi kabakhuthale basike utshani baphinde njalo babuthe amahlanga lamakhasi amazambane emasimini baphanyeke ezingalaneni. Lokhu kuzabancedisa nxa utshani sobuphelile emadlelweni,” kuphetha uMnu Nyoni.
