uMthunywa
Langelihle Moyo
ABALIMISI sebekhuthaze abalimi ukuthi bakhe ingalane eziqinileyo njalo ezibetha umoya ukuze umumbu wabo wome kuhle njalo ungadliwa ngumuhlwa.
UNkosazana Moreblessing Dube ongumlimisi eMatabeleland South uveze ukuba ingalane ziyafuneka njalo ziqakathekile njengoba isikhathi sokuvuna sesifikile. Uthe abalimi kumele baqakathekise ububanzi bengalane zabo.
“Ububanzi bengalane kumele bube yi-1,5 metres ukwenzela ukuthi umumbu wome kuhle. Ingalane ingaba banzi yenza umoya ubethe kuhle okuyikho okuphathisa ukuthi umumbu wome ngendlela ekhangelelweyo.
“Ingalane kumele yakhelwe phezulu, njalo ibebanzi ukuze umumbu wome kuhle njalo nxa usubhula kumbe uhulula uhululeke kuhle. Yikho siqakathekisa ububanzi bayo ukwenzela ukuba umumbu wome kuhle njalo nxa umoya uphephetha uphephethe engalalanini evulekileyo,” kuchasisa uNkszn Dube.
Uthe abalimi kumele babone ukuthi ingalane zabo zinde njalo ukuya phezulu ukwenzela ukuthi izifuyo ezinjengembuzi zingafinyeleli kusivuno esisengalaneni.
“Balimi nanzelelani ukuthi ingalane zenu zinde, okokuthi izifuyo ezinjengembuzi azifinyeleli lapho okulamabele khona,” kuphetha uNkszn Dube.
