uMthunywa
Langelihle Moyo
ABATHENGISA imithi yezifuyo esitolo seFarm and City sebexwayise abalimi ukuthi baqaphele umkhuhlane we-Red water ohlasela inkomo ngoba isibaya singavalwa sonke.
UMnumzana Itai Shambambeva osebenza esitolo lesi njalo eyingcitshi kwezempilakahle yezifuyo uthe umkhuhlane weRed water ubangelwa yisibungwana esibizwa ngokuthi yi-protozoan parasite.
“Ama-protozoan parasites athwalwa esuka kwenye inkomo esiya kwenye yimikhaza elombala onsundu. Izibungwana lezi zingafika emzimbeni wesifuyo zihlasela amasotsha omzimba wenkomo.
“Inkomo esihlaselwe ngumkhuhlane lo ibonakala ngokwehluleka ukuhamba, ukuphela amandla, uqhuqho, ukusilela igazi kanye lomthambiso wayo uba lombala obomvu okuyikho lapho okuvelela khona ibizo elithi-red water,” kulandisa uMnu Shambambeva.
“Okubi ngomkhuhlane lo yikuthi inkomo sokungenzeka ukuthi zife kungakaphumeli egcekeni ukuthi zihlaselwe ngumkhuhlane lo.
“Kungakho okungenziwa ngabalimi bezifuyo ukuvikela umkhuhlane lo yikuzama ukulwa lemikhaza eyiyo ehlasela inkomo njalo esuka kweyinye inkomo isiya kwenye ithwele umkhuhlane.
“Lokhu umfuyi wenkomo ukwenza ngokudibhisa inkomo kabili ngeviki kulesi sikhathi sezulu, nxa ukudibhisa kungekho kufanele afafaze inkomo zakhe,” kuchasisa uMnu Shambambeva.
Uthe abafuyileyo bayenelisa ukuthenga umuthi obizwa ngokuthi yi-imidocarb dipropionate eyiyo elwa le-protozoan parasite loba i-diminaze aceturate.
“Abalimi ukuze bavikele inkomo zabo emkhuhlaneni lo kumele bathenge umuthi obizwa ngokuthi yi-imidocarb dipropionate oyiwo olwa lezibungwana lezi.
“Okunye njalo okubalulekileyo yikunika inkomo ukudla okule-iron lama-vitamins okuzancedisa ama-red blood cells azo. Lingasebenzisa i-tick-grease amafutha agcotshwa inkomo ukuze zikivileke emkhazeni. Umuthi lo ugcotshwa endlebeni langaphansi komsila njalo nxa inkomo ithole usizo lokwelatshwa ngesikhathi iyenelisa ukuphila,” kuphetha uMnu Shambambeva.
