uMthunywa
YiNtatheli kaMthunywa
KULENINA lelokitshini leMakwasha eZvishavane elidla amalahle ngemva kokuthola isikhindi sikamakhwapheni womkalo endlini yabo yokulala.
Lindaba esibangele ukuthi lo ocatshangelwa ukuthi nguye umnikazi wesikhindi adlele egilweni yenzakale ngoLwesithathu kuviki ephelileyo lapho uNkosazana Panashe Kandera athole impahla yangaphansi yowesifazane endlini yomkakhe, uTadiwa Zhou evela ekhaya.
UNkosazana Lubelihle Ncube ohlala loZhou lo Nkosazana Kandera uthe kwalwiwa kwaba luthuli ababili laba bebanga impahla le.
“Umka Zhou ubevakatshele ekhaya okwamaviki amabili, uZhou ngumuntu onathanyo sibilinjalo yinto yakhe yokuthi nxa umkakhe engekho kulonkazana amngenisayo endlini, kalandaba ngitsho lathi ukuthi siyakwazi ukuthi uthethe.
“Mina ngangiphumile ngiye ezitolo ngithe ngiphenduka ngathola sokungumsindo endlini abantu sebesilwa uKandera sethole isigqoko sangaphansi sowesifazana endlini, uZhou wayemlwisa ezama ukujwamula impahla le,” kutsho uNkszn Ncube.
Omunye umakhelwane othe unguTotenda uthe yena wezwa ngomsindo komakhelwane wakhe uNkszn Kandera esithi uzaloya umuntu avaleke isitho sangasese nxa engazivezanga.
“UNkszn Kandera wayekhuluma amazwi ethusa umuntu wonke, nxa unkazana lo ehlakaniphile kayemxolisa ngoba uthukuthele mpela.
“Indlela abekhuluma ngayo mina ngibona ingani kamethuseli uqinisile uzakwenza sibili, abahlalisananga kuhle abantu laba ngenxa yezenzo zikaZhou lezi manje sokutholakale iphenti asazi,” kutsho uTotenda.
Ebuzwa ngodaba lolu uNkszn Kandera uthe ngeke aphumule loba sekutheni umfazi ofuna ukumchithela umuzi wakhe engabhadalanga.
“Ngithwele nzima ngamankazana kaZhou, angisahlalanga kuhle ngitsho sihlala sixabene nsukuzonke ngendaba zolezi. Mina bengivakatshele ekhaya ekuphendukeni kwami ngisazama ukulungisa endlini njengoba bengingekho nanko ngidibana lengcekeza le ngezwa ubuhlungu ukuthi kambe umuntu sengalala embhedeni wami labomahotsha bakhe.
“Isikhindi lesi ngifuna ukusilungisa bakhona abantu abazamlungisa acine into zokuganga lamadoda abantu, ngihlala ngisizwa ngenkazana leyo manje khathesi uphambanisile wakhohlwa into engizayisebenzisa ekumlungiseni,” kutsho uNkszn Kandera.
UMnu Zhou yena uphike wemba phansi ukuthi balwe lomkakhe bebanga isikhindi sikamakhwapheni wakhe.
“Umuntu yena lo abathi yintombi yami ngumzawami abantu bakhuluma izinto abangazaziyo kumkami, okwesikhindi angazi lutho mina,” etsho ecitsha ucingo lwakhe uMnu Zhou.
