uMthunywa
Bongani Ndlovu
LISELE lixega amadolo inina leCowdray Park ngemva kokuba umzukulu walo etshayele imali yalo yenkomo esikhewini ethenga utshwala lempahla labangane bakhe edolobheni.
Intatheli kaMthunywa izwe ukuba umfundi (igama silalo) owenza uFomu 1 esikolo seCowdray Park High watshontshela ugogo wakhe imali engange RTGS$1 000 le 700 rand ngemva kokuba ugogo ethengise enye yenkomo zakhe ekhaya ukuze abelemali yokunakekela abazukulu bakhe engazi ukuba abazukulu bazabuya babe yibo abazigwaza ngomkhonto ngokumtshontshela.
Ekhuluma lentatheli kaMthunywa ugogo lo ubike ukuba kuliqiniso ukuba umzukulu weba imali endlini.
“Ngemva kokuyitshintsha indawo lapho imali ehlala khona ngimadolo nzima ngesenzo somntanomntamani ngeviki ephelileyo. Ngithole kusele iRTGS$70 emalini engangibuye layo ekuthengiseni inkomo ngemva kokuba bekulemali eyedlula iRTGS$1 000 lama-randi phakathi,” kuveza ugogo uMaNdlovu.
Uqhubekele phambili waveza ukuthi ngemva kokunanzelela ukuba imali yakhe ayisekho wehlulekile ukumtshaya loba ukuya emapholiseni.
“Ngehluleke ukumfaka isandla ngoba ngilokhe ngethukile ukuba umntwana omncane kangaka usithatha ngaphi isibindi esingako.
Okungihlasimulise umzimba kakhulu yikuthi ngemva kokumbamba lapho sebhala phansi into azithenga ngemali sithole ukuba umntwana lo ubethenga utshwala ethengela labangane bakhe impahla zokuqgoka,”
“Enye into engibambe ukungayi emapholiseni yikucina sengixabana labomakhelwane ngoba abantwana bone bebonke kungakho ngizakukhulumisana labanye omakhelwane, ku” kuchaza ugogo uMaNdlovu.
Omunye wabomakhelwane othande ukuvezwa ngelokuthi MaMoyo kuphela nje uthe lokhe bethukile ngaleso senzo somntwana wabomakhelwane.
“Umntwana lo ukhule simkhangele njalo simazi engumntwana ohloniphayo njalo olenhlonipho, lathi njengomakhelwane sibuhlungu njalo sidumazekile ngalesi senzo somntwana omncane kangaka sokuthathela ugogo imali ukuze bayezinathela utshwala kanye lokuthenga impahla labangane,” kuveza uMaMoyo.
