uMthunywa
KUNDATSHANA yethu edluleyo ngithe u-Community Relations and Liaison Officer (CRLO) ngumpholisa omela inhlelo zonke eziphathelane lomanyano kazulu lamapholisa endaweni yakhe lapho asebenzela khona. Njengoba leyondatshana ngiyiphethe ngokwethembisa ukuba kwezayo sizaqalisela ekuzweni ukuba kuyini esikuthola ehofisini kaCRLO, yikho lapho esesikhona okwamanje mahlabezulu.
Umpholisa lo esikhuluma ngaye bakwethu nguye olomlandu wokucanda (lapho engekho khona) indlela yobudlelwano obuhle phakathi kweZimbabwe Republic Police (ZRP) lozulu endaweni yonke elawulwa yinkamba yakhe. Lokhu ukwenza ngendlela ezithe xaxa ezaziwayo lezintsha angazithola kuzulu kumbe ukuzicabanga yena ngokwakhe. Indlela yakuqala yikwamukela kuhle izethekeli lokuphatha kuhle wonke umuntu odinga usizo lwamapholisa kunye lokufundisa uzulu ngemisebenzi yeZRP njengakhonokhu esikwenza kuWatsha Tsotsi. Esinye sezizatho zalezi zifundo, yikubonisana lozulu ngezindlela angaphathisa ngazo amapholisa eZRP ekuqhubeni lowomsebenzi wawo.
U-CRLO uphethe ihofisi eyiyo ekhangelelwe ukuqhuba eminye njalo imisebenzi egoqela elandelayo:-
· Ukusungula, ukuqhuba lokugcina inhlelo zemfundiso kazulu mayelana ngomsebenzi wamapholisa eZRP;
· Ukufundisa umphakathi ngazo zonke izindaba eziphathelane lokudalwa kwamacala lokulandelwa kwemithetho yesizwe;
· Ukuqinisa lokugcizelela inhlelo zonke esezabonakala ukuba ziyaphathisa kuqoqo lenhlelo zomanyano kazulu lamapholisa lezi ezethiwa igama lika-Community Policing;
· Ukuxhuma uzulu wonke kumbe umphakathi lamapholisa alawula indawo lapho uCRLO lo asebenzela khona;
· Ukusungungula lokuthuthukisa ingqubelaphambili lempumelelo yenhlelo zokukhulumisana kwamapholisa lozulu osokugoqela lamaWhatsApp kulezi insuku;
· Ukusungula inhlelo zonke zokucebisana kwamapholisa lozulu ngendaba zakoCALA lomzali wakhe uSigilamkhuba, lapho eziyabe zingekho khona kumbe zinganelanga;
· Ukuvuselela ubudlelwano lokukhulumisana kuhle kwamapholisa lozulu lapho lobobudlelwano obuyabe sebungani sebumunyu khona;
· Ukulondoloza ubudlelwano obuhle phakathi kukazulu lamapholisa;
· Ukududuza lokuqinisa amanye amapholisa ayabe ebhekane lobunzima empilweni kumbe emsebenzini;
· Ukududuza lokuqinisa abayabe bedalelwe amacala kumbe behlukuluziwe ngokudalwa kwalawomacala kumbe abayabe besengozini yokuhlangana lalokho kuhlukuluzwa;
· Leminye imisebenzi enjalo esizayifundisana ngoba singeke sayiqeda kundatshana yinye.
Ubudlelwano phakathi kweZRP lozulu kumele bube yibuhlobo obuqotho ngoba bumqoka kakhulu ukuze uCALA lomzali wakhe bangabi lalo ithuba lokusingenela njengezifo ezilondeni kumbe ukufohlela ezibayeni kumbe intango zethu esiyabe sivimbe ngazo empini yokulwa lokudalwa kwamacala eZimbabwe. Ngokunjalo ke, phela sinanzelela ukuthi kuseselabanye ababikwa besawayesaba amapholisa eZRP wona engamapholisa kazulu aqatshwa nguHulumende ukuthi asebenzele umphakathi kumbe yena uzulu lo. Amapholisa la awamukela ngenhliziyo yonke umsebenzi lo afungela ukuwuqhuba ngemfanelo ebusuku lemini ngakho kakumelanga siwesabe. Abanye njalo ngababikwa besithi uma bebheka ipholisa babone inyoka ephilayo le eyahlatshelwayo, isesambeni sepholisa — izankosi. Kababoni mngane kumbe umsizi wabo kodwa babona ukubotshwa kuphela! Yeyi madoda, kunzima.
Ngakwesinye isandla njalo sizwa kuthiwa kulamanye amapholisa athi wona nxa ebheka uzulu, abone umphakathi ogcwele izikliwi, izigebenga lezigilamkhuba kuphela bakhohlwe ukuba hatshi uzulu ngumsizi wethu njalo yilo ikhiwa lamapholisa elisifoloma nsuku zonke lokubona ukuba siqhuba kuhle na umsebenzi wethu kumbe hatshi! Ukwehlukana kwemibono le engiyethule lapha yikho okuveza ubukhulu bomsebenzi kaCRLO. Phela yikho okwabangela ukuba ihofisi le ivulwe ngo1985 kuleli ngemva kokunanzelela ukuba; ikakhulu ngesikhathi sochuku lwabamhlophe; amapholisa ayesaziwa ngokuhlukuluza abansundu ngezinja lokunye okunjalo.
UCRLO munye ngamunye kuleli lizwe lethu leZimbabwe; ulomlandu wokuvezela uzulu wonke wakuleli kunye lezethekeli eziyabe zifike endaweni yakhe kulendingeko yokuba zingene ehofisini lakhe kumbe ukuhlangana laye eqhuba umsebenzi wakhe wansukuzonke phakathi komphakathi; ukuba amapholisa eZRP ayingxenye kazulu. Lokhu kumele akwenze ngobunono baphezulu njengalokho okwathenjiswa nguSibalukhulu weZRP uCommissioner General of Police (CGP) kusukela ngo1995. Kumele ke sikuchaze mhlophe njengamaCRLO ukuba iZRP iyingxenye yomphakathi eyazimisela ukufungela ukulawula imithetho yesizwe isebenzisa amandla ewanikwa ngu-subsection 219(1) wesisekelo semithetho yesizwe (Constitution). IZRP lozulu bangumanyano ofana lezitho zomzimba njalo balubumbano esiluthembayo ukuba nxa sokusiya kwezokudalwa kwamacala lokubanjwa kwezigilamkhuba, bangu-number 1 phose emhlabeni wonke jikelele.
Awubo bakwethu, kusinwa kudedelwana yekelani ngime lapha lingaphela phela ikhasi lethu singakayi kwezinye izindaba zephephandaba likazulu eziyiluju lwenyosi! Sidibane kwelizayo sesijula ngohlelo lwethu lweZRP CRLO.
Umlobi utholakala ku-(04) 700171-9 Extension 3193; 0735752386/0716616987/ 0783185092/[email protected]/ [email protected]/[email protected]
