uMthunywa
Joel Ndlovu
ABALIMI abafuye imbuzi sebexwayiswe ukuthi bavikele imikhuhlane ebangela ukuthi ziphunze efana le- campylobacter le-Chlamydia.
Ekhuluma lentatheli kaMthunywa uMnumzana Kevin Moyo oyingcitshi kwezokufuya esabelweni seMatabeleland North uthe umkhuhlane we- campylobacter le chlamydia iyingozi ngoba yenza imbuzi ziphunze kumbe zizale amazinyane akhubazekileyo.
“Umkhuhlane we-campylobacter uhlasela imbuzi nxa isizala. Imbuzi esihlaselwe ngumkhuhlane lo ibonakala ngokuphela amandla njalo iyehluleka ukudla okubangelwa yikukhathazeka emoyeni.
“Umkhuhlane lo ungelatshwa ngokuyipha umuthi we-tetracycline kumbe i-sulfa drug. Imbuzi ingelatshwa kuhle iyama ukuphunza,” kulandisa uMnu Moyo.
Kubikwa imbuzi zingahlatshwa ijekiseni ye-tetracycline kumbe kufakwe umuthi lo ekudleni kwazo.
Uqhubekele phambili esithi umkhuhlane we-chlamydia uhlasela imbuzi emavikini amabili okucina nxa isizazala.
“Umkhuhlane lo uyingozi kakhulu ngoba uyatheleleka lula. Imbuzi ezizithweleyo nxa zingahlaselwa ngumkhuhlane lo kumele zihlaliswe zodwa zize zizale. Umlimi kumele abone ukuthi uyahlola imbuzi ezimithiyo njalo nje ukuze abone ukuthi ayilamkhuhlane ngoba engalahlekelwa yinzuzo yakhe.
Uphethe ngokuthi imikhuhlane le ayisiyo yodwa ebangela ukuphunza kodwa ukulwa kwazo kanye lokuphathwa kubi kulakho futhi ukubangela ukuphunza ngakho-ke kuqakathekile ukuthi ofuyileyo aphathe kuhle imbuzi zakhe njalo abone ukuthi azilwi.
