uMthunywa
Yintatheli kaMthunywa
KULENDODA yendaweni yeMbamba eTsholotsho exotshwe esigabeni ngemva kokuhlala igangela amaphenti abomama nxa bezodinga uncedo.
Indaba le ivele ngeviki ephelileyo lapho uSibanda exotshwe esigabeni ngemva kokumiswa enkundleni phambi kwenduna uGampu esetheswa icala lokuphazamisa ukuhlala kuhle kwabantu.
UMthunywa uxhumane lenduna uGampu oveze ukuba lumuntu wamaphenti kumele athuthe esigabeni.
“Sikhuthaza ukubambana njalo lokuhlalisana kuhle hatshi ukuthi abantu baxabane.
Ubaba lo uyelapha kodwa akade sekwenza kubi, ubesethatha impahla yabomama yangaphansi ayilungise bacine abanye besiya emfuleni bengaqedi ngoba egangele impahla yangaphansi okuyinto ebisithwalise nzima omama ngoba bebethi bangahamba besiyadinga uncedo kuye athi kumele balethe isikhindi ukuze balungiselwe,” kubika induna uGampu.
izikhindi zabomama
Uqhubekele phambili eveza ukuba inkundla ibone kufanele ukuba umuntu onjalo asuswe isigabeni.
“Simtshelile ukuba sekumele athuthe esigabeni ayehlala kwenye indawo ngoba seyingozi emphakathi, akumelanga ahlale labantu bangacina belimala ngokuganga kwakhe.
Njalo ubengenzi okwempahla yabomama yodwa kodwa ubesethiye omunye ngamanalithi wazophosela lapho okunatha khona izifuyo. Amanalithi la, alakho ukulimaza izifuyo zethu kungakho inkundla ithe akathwale imithwalo yakhe ayedinga kutsha indawo yokuhlala,” kuphetha induna uGampu.
