uMthunywa
Ethel Ncube
KULENDODA yeBinga ngaphansi kwenduna uDobola egwazwe kanengi kulandela ukufohla kwembuzi zayakudla emasimini esinye isakhamuzi.
Indaba le yenzakale emavikini adlulileyo lapho uJabulani Mudenda egwazwe nguMnumzana Jordan Sibanda kubangwa ukuba izifuyo zifohle emasimini zadla umumbu okuyindaba exabanise laba ababili omunye wacina ekhipha ingqamu egwaza omunye.
Kusenjalo esinye isakhamuzi seGwanda sitshaye omunye ngepiki kubangwa ubabhemi laye ofohlele esivandeni sabantu.
UMthunywa uxhumane lesinye isakhamuzi esiseduze lodaba lolu uMnumzana Bhekiwe Muleya oveze ukuba basakhulumisana ngodaba lolu.
“Indaba le yenzakala, uSibanda wadlelwa umumbu wakhe zimbuzi zika Mudenda okwenza wamlanda wafika wathi ufuna inhlawulo njengoba imbuzi zibhuqe insimu yakhe.
UMudenda kubikwa waphendula wathi uzasala eyidinga imali yokuhlawula kodwa uSibanda akuzange kumphathe kuhle lokhu ngoba wayeyifuna khonapho imali.
Ngenxa yokuthukuthela uSibanda wahwatsha ingqamu elenkanyezi ezintathu waqala ukugwaza uMudenda emzimbeni wasala elamanxeba ayisikhombisa.
‘’Bathi beqeda bahamba emapholiseni ngelanga elilandelayo bafika bathi bazakhulumisana babhadalane kulokuthi owonileyo abotshwe,” kubika uMnu Muleya.
“USibanda wafika esidla ubhedu ngazama ukumxolisa kwakhanya engazwisisi wakhupha ingqamu wangigwaza emzimbeni ngasala ngilamanxeba ayisikhombisa.
Sahamba emapholiseni kodwa ngacina ngisesulisa icala ukuthi sikhulumisane. Umangigwaza wathenga konke okwesibhedlela okufunekayo,” kubika uMnu Muleya
Ekhuluma loMthunywa uMnumzana Jordan Sibanda onguye owagwaza omunye, uvumileyo ukuba wagwaza uMudenda.
“Ngahamba ngizondile ngisiyambikela ngezifuyo yena wafika wangangiphenduli kuhle ngacina ngimlimaza kodwa sesakhulumelana salungisa indaba yakhona,” kubika uMnu Sibanda.
Intatheli ikhulumisane lenduna yakule indawo uDobola oveze ukuba udaba lolu alukafiki kuye. “Izakhamizi lezo azikafiki kimi zizongibikela udaba olunjalo,” kutsho induna uDobola.
