uMthunywa
Ethel Ncube
KULENDODA yeZezani bucwadlana ledolobho leBeitbridge evuke iphucwe ikhanda inwele zigcwele emqamelweni okwenza izidle izibindi nanko phela ikholwa ukuthi lokhu kubangelwe liwabayi elidlileyo.
Impicabadala le yenzakale ngoMvulo ngeviki ephelileyo lapho uTobias Moyo avuke elempabanga ekhanda inwele zigcwele emqamelweni.
UMthunywa uzwe ukuthi uMnu Moyo ubesehlutshwe kakhulu zinyoni lezi emasimini akhe wasezithiya wabamba eyodwa wahamba layo ngekhaya andubana athi unkosikazi wakhe amphekele engazi ukuthi sezokhela amalahle ekhanda.
Iphephandaba likazulu likhulumisane lesinye isakhamuzi uMnumzana Bhekani Dube sakule indawo esiveze ukuthi indaba le esansumansumane ngempela yenzakala.
“Mina uMoyo ngambona sethutshile ekuseni kusesempondo zankomo ezongisusela umhlolo.
“Wangibikela ukuthi uvuke inwele zakhe zonke zigeliwe wathi uyazikhangela wazithola engutsheni.
“Ikhanda lakhe lalicazimula samuntu ogelwe ngeleza njalo akuthembisi ukuthi uzabuya abe lenwele futhi,” kuchasisa uMnu Dube.
“Ngathi ngimbuza ukuthi zingabe zikhitshwe yini wathi liwabayi. Waveza ukuthi ubethiye ensimini yakhe wasebamba iwabayi athi unkosikazi wakhe amphekele lona walidla wayalala, ukuthi kwenzakalani kakwazi,” kutsho uMnu Dube.
Iphephandaba likazulu lizwe ukuthi unkosikazi wakhe wala ukudla inyoni le yena wazincindela engazi ukuthi sezigela ikhanda ngokuyidla.
UMthunywa uxhumane loMnu Moyo ochaze ukuthi impilo yakhe yonke kukhanya kaselakuba lazo inwele futhi.
“Kwakuntambama ngabuya ngithwele iwabayi lami bafika bangiphekela ngekhaya ngalidla ngakholisa ngakhotha umganu ngasengisiya lala.
“Ngithe ngivuka ekuseni ngezwa ikhanda libetha umoya ngathi ngithi mehlo suka esibukweni ngathola inwele zonke zingekho ekhanda lempabanga yakhona ingathi ngeyexhegu,” kuchasisa uMnu Moyo.
Uqhubekele phambili esithi inwele wazibona emqamelweni.
“Inwele ngazibona engutsheni zami ngazithatha ngazisa enyangeni yangitshela ukuthi ngidle inyoni yomnikazi.
“Mina ngangihlala ngikhathazeka ukuthi zahlupha kangaka emasimini ami ngingazi ukuthi zithunyiwe ukuzophuca ikhanda lami okwakhathesi ngisadinga icebo lokuthi ngenze njani kodwa okwenwele sengikhohlwe ngazo sezaphuma azisaphindi zibe khona,” kuphetha UMnu Moyo.
