uMthunywa
Khanyile Ndebele
KULAMADODA ayisikhombisa eMagedleni eGwanda ahlasele enye indoda ngezigodo kunye lamatshe yaze yafa ngoba icatshangelwa ukuthi itshontshe imvu etholakale iyihlinza.
Abetheswacala abathi uMayibongwe Nsingo (38), Thulani Mdlongwa (33), Likhwa Nsingo (20), Thobekani Nsingo (20), Starnford Nsingo (44), Khumbulani Nsingo loMoses Ndlovu kubikwa mhlaka 3 Zibandlela bananzelela ukuthi kwakubaswe umlilo kulowomuzi ngehola lika 3 ekuseni kukanti umninimuzi engekho kungakho njengomakhelwane basuka bayakhangela bafica uRichard Ndlovu ehlinza imvu bahle bavele bamsusela amanqe bethi uyitshontshile.
Kuzwakale ukuthi abayisikhombisa bafica uNdlovu ehlinza imvu ababecabangela ukuthi itshontshwe kuUnite Ndlovu (58) baqala ukumtshaya ngamatshe lezigigodo waze wathwalela esibhedlela seGwanda lapho ebhubhela khona.
Kubikwa abahlanu balaba abayisikhombisa sebesezandleni zamapholisa kukanti abababili uKhumbulani Nsingo loMoses Ndlovu abakabanjwa.
Isikhulumi samapholisa eMatabeleland South uInspector Loveness Mangena uxwayise uzulu ukuthi angafaki umthetho ezandleni zakhe.
“Abantu akufanelanga bathathe umthetho bawufake ezandleni zabo. Abantu bengabamba umuntu olecala kabamhambise emapholiseni aseduze lalapho abahlala khona bengabahlukuluzi loba ukubalimaza ngoba lokhu kuyabe sokulicala,” kutsho uIns Mangena.
