uMthunywa
INtatheli kaMthunywa
KULOMTSHAYELI wegonyethi obhubhe kuviki ephelileyo eBeitbridge kulandela ukutshaywa likhanda lemota ezama ukuyilungisa.
Umuyi uLeeroy Ntakabawu oleminyaka engu-34 kubikwa wafelwa yimota endleleni wasevusa ikhanda layo, ezama ukudingisisa okwakusenza ingasahambi ngokuswelakala kwenhlanhla wasetshaywa likhanda lemota engaphansi wafa.
Ekhuluma lentatheli kaMthunywa uMnumzana Dambudzo Ndou omunye owabona ingozi le isenzakala uveze ukuthi lokhu belesithuli ngengozi le.
“Ngilokhu ngitshwaqeke umzimba ngilapha. Engakubona ngaleliya langa kangikaze ngikubone lokhu ngathwetshulwa yingwe njalo kangifisi futhi ukuphinda ngibone okunjeyana.
“Umtshayeli wegonyethi lo kukhanya waba lohlupho lemota yakhe waseyivusa ikhanda ethi akhangele uhlupho kanti kabuzanga emadlozini akwabo. Ikhanda ayelibambile lavela nje lakhululeka layamtshaya ikhanda wahle wathula,” kulandisa uMnu Ndou.
“Ingozi le yenzakala ngesikhatshana nje kayizange imnike lethuba lokuvika kwangathi nje ngumuntu oginywa yingwenya.
Kubikwa amapholisa abikelwa ngesehlakalo lesi.
Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uthe solufikile ehofisini yakho njalo basaluphenyisisa.
“Udaba lomtshayeli otshaywe likhanda lemota ezama ukuyilungisa solufikile ehofisini yethu, sisachwayisisa ngalo kabanzi,” kuphetha ulnsp Ndebele.
