uMthunywa
Thokozile Mbedzi
ZILOKHU zinkemile izakhamizi zesigabeni seMarula esigabeni seMangwe ngemva kokuba enye indoda idubule enye kubangwa isikwelede seR300 ngeviki ephelileyo.
Kubikwa uDumisani Ncube oleminyaka engu-37 wesigabeni seMarula uhambe esiyabuza isikwelede sakhe seR300 ku-lnnocent Dube ongu-Game Ranger oleminyaka engu-50 wafika waphika ukuthi ulemali yakhe wasekhokha umbombo wohlobo lweBaikai short gun wamdubula inqagala.
Ekhuluma lentatheli kaMthunywa uMnumzana Mafios Ndebele uthe kuyisimanga ukuthi umuntu omdala udubule omunye kubangwa nje imali encinyane.
“Silokhe sithithibele esigabeni ngoba nxa umuntu ezaphuma lombobho womsebenzi abe sezodubula ngawo abantu emakhaya kuyethusa.
“Isenzo lesi kasisiphathi kuhle ngitsho, sasikwazi ukuthi nxa umuntu etshayisa utshiya umbobho emsebenzini, pho yena ubuye lawo njani nanko useze wabulala umuntu ngawo.
“UDumisani ubesiyathonisa imali yakhe, iR300 wahle wamdelela ngoba elenkafula kufa wathi akala sikwelede sakhe. Wantela ezinathela itiye eceleni kwemkulwini wakhe. Waphinda wathi uyadelela ngokuza emzini wakhe ezomhlupha bahle bangasazwisisani ababili laba,” kutsho uMnu Ndebele.
Kubikwa khonokho nje uDube wathatha umbhobho uNcube wahle wahlifiza inqagala andubana amfake emkulwini wakhe.
Indaba le yabikelwa amapholisa, uNcube wagijinyiselwa esibhedlela seMpandeni lapho afika wadluliselwa ePlumtre District Hospital ngoba ekusimo esibi.
Isikhulumi samapholisa esabelweni seMatabeleland South lnspector uLoveness Mangena ebuzwa ngodaba lolu uthe bona njengamapholisa baxwayisa uzulu ukuba batshiyane lodlame nxa kuxazululwa ingxabano.
