uMthunywa
Thando Dube
“ANGENELISI ukuchaza ukuthi kwahamba njani ngesikhathi ngibulala usana lwami kodwa engingakutsho yikuthi ngezwa ngisiba lesiyezi. Umoya kasathane yiwo owangenza ngabulala umntanami ngoba mina angikhumbuli ukuthi ngakwenza njani”.
La ngamazwi kaSiphiwe Shumba olemiyaka yokuzalwa engu-25 njalo ehlala elokitshini leNjube ngesikhathi ebuzwa ukuthi kungani wabulala usana lwakhe esanda kubeletha emthethwandaba weWestern Commonage ngeviki ephelileyo.
USiphiwe Shumba oleminyaka yokuzalwa engu-35 ohlala elokitshini leNjube umiswe emthethwandaba weWestern Commonage kuviki ephelileyo esetheswa icala lokubulala usane lwakhe esanda kubeletha.
Umtshutshisi walelicala uNkosikazi Thembeni Mpofu uthe mhlaka 28 Nhlangula umetheswacala wayeyedwa endlini. Ngesikhathi esendlini kukhanya waqala ukuhelelwa andubana azibelethise. Ngemva kwalokhu kubikwa wabulala usane ngokulutshaya ekhanda ngesikhali esingaqanjwanga, waselufaka esakeni andubana alahle isidumbu emgelweni oseduze lebhawa yeFiga.
Isidumbu sosane satholakala okwabangela ukuthi umetheswacala abotshwe. Isidumbu sosane sahlolwa kwatholakala ukuthi umsolwa watshaya usane lwakhe ngesikhali ekhanda okuyikho okwabangela ukuthi lufe.
Emi phambili komthethwandaba, umetheswacala ulivumile icala lakhe wathi wayekhokhelwa yimimoya kasathane emibi. Umantshi uNkosazana Tancy Dube unqume ukuthi umetheswacala avalelwe ejele okwenyanga ezilitshumi lanhlanu (15) zona ezesulwe ekubeni umetheswala enze iCommunity Service okwamahola angu-420.
