uMthunywa
Ethel Ncube
KULEMULI yeNgozi Mine koBulawayo ephakathi kwelitshe lembokodo nanko phela ilendodakazi esihlala isesikhathini kokuphela ingami osokubangela lokuthi ilandelwe zimpukane.
Isimo salumntwana sithinte omunye oyisakhamuzi sakoBulawayo ohambe wayayibona limuli andubana ayinike impahla esetshenziswa nxa abesifazane besesikhathini.
Indaba le ivele kuyonale iviki ngemva kokuba omunye wabomama evakatshele imuli le esiyancedisa ngempahla engasetshenziswa ngumntwana lo.
Umntwana lo esingeke simqambe ngebizo ngenhloso yokumvikela usephila nzima nanko phela uselesikhathi engena esikhathini okungalamkhawulo.
UMthunywa uxhumane lesinye isakhamuzi esingathandanga ukuqanjwa ngebizo esithe umntwana lo usebunzimeni.
“Umntwana lo uthwele nzima, isimo akiso sibuhlungu kakhulu.
Ukuya esikhathini kokuphela akusinto elula ngitsho.
Udinga usizo ikakhulu olwama-pads ngoba uhlupho lwakhe ngolwansuku zonke.
“Abadala abasazi lokuthi babambe ngaphi ukuze basize umntwana lo ngoba lempukane kubikwa uyazibona zimlandela.
“Udinga usizo impela umntwana lo ngoba lesibhedlela kakayi ukuze ahlolwe kudingisiswe ukuba lokhu kubangelawa yini.
“Lo ngumntwana okumele ukuthi abezidlalelela labanye kodwa ngenxa yohlupho lolu kunzima kakhulu ukuthi ahlale ekhululekile. Abenelisayo ngabe bayelula izandla zabo baphathise umntwana.
Abangabe besazi ukuthi angancediswa njani ngabe labo bayasiza ngoba ukuhlupheka okunje akumelanga kuzwiwe yiloba ngubani,” kuphetha lesi sakhamuzi. Ukhulu Mhabhinyane ongusiyazi koBulawayo uthe lokhu akwandisanga ukwenzakala.
“Ekadeni vele umntwana ongaka ubengangeni esikhathini kodwa kulezinsuku kukhanya izinto sezaguquka abantwana sebengena esikhathini bebancane.
“Lokhu okwenzakala emntwaneni lo kubuhlungu kakhulu, ukhona ogangela abazali bomntwana ozama ukubakhawulisa ngokuzwisa umntwana ubuhlungu,” kuphetha ukhulu uMhabhinyane.
