uMthunywa
YiNtatheli kaMthunywa
UMDLALI wenguqu owake waduma esadla ubhedu kuleli uObadiah Tarumbwa usesebenza emgodini wegolide oweTrukumb Mining eFilabusi.
UTarumbwa osemabhukwini eqembu leTalen Vision kubikwa ukhethe ukuthi agebhe umhlaba kulandela ukudonsa umnyaka wonke ehlezi endlini ngoba kungela bhola elidlalwayo.
Umdlali lo, njengabo bonke kunguqu lakweminye imidlalo, ulinde ukuzwa ukuthi uzabuyela nini enkundleni kulandela ukumiswa kwemidlalo ligcikwane leCovid-19.
Inkampani yezimbamgodi le esetshenzelwa nguTarumbwa ikhokhelwa ngusomabhizimusi uKhumbulani Nkomo ophinda abengumaqhuzu weqembu leTalen Vision.
Umaneja weqembu leli uJuma Phiri uthe baqhatsha uTarumbwa ngoba ecele ukuthi abe ethola okokwenza okuzamnikeza imali.
“Sananzelela ukuthi kumele siphakamise impilo zabadlali bethu ngalesi isikhathi seCovid-19. Ngokunjalo sesiqhatshe abadlali abathile,” kutsho uJuma.
Kubikwa ngaphandle kuka-Tarumbwa, omunye umdlali oseyisimbamgodi ngukaputeni weTalen Vision uMongameli Ndlovu.
Inengi labalandeli benguqu bakhumbula uTarumbwa ngesikhathi esadlalela iqembu le-Highlanders.
