uMthunywa
Ethel Ncube
ABANTU bazakudla ukudla kwamehlo lendlebe kumkhosi wokutayila ozabe usePlumtree ngempelaviki nanko phela uSandra Ndebele kunye loClement Magwaza bazavuthisa inkundla.
USandra Ndebele
Abathandi bezokutayila bazabe bethe gwaqa e-Omadu Lodge enzikini yePlumtree kumkhosi wokuqala weMiss Tourism Mangwe Beauty Pageant oqoqwe yiMatabeleland South Youth In Tourism.
Kumkhosi lo kukhangelelwe ukukhethwa iNdlovukazi yesigabeni seMangwe ezamela ezokwethekelelana phakathi kwamantombazana angamatshumi amabili azabe encintisana kwezokutayila.
UClement Magwaza
Omunye ozajabulisa abantu kumkhosi lo, uSandra Ndebele uthe lokhe wangena kwezomculo uhlala efisa ukungena esitikini loMagwaza kungakho idolobho lePlumtree selimnike ithuba leli.
“Bekuyisifiso sami ukuba ngelinye ilanga ngisebenzisane loClement Magwaza sibe sesitikini sonke kungakho umkhosi wokutayila lo usungiphe lelothuba,” kutsho uSandra.
Uthembise uzulu ukuthi babuye ngobunengi babo kumkhosi lo wokutayila ngoba kuzabe kungabizwa ozwayo.
“Ngikhuthaza abantu bePlumtree ukuthi babuye kumkhosi lo wokuqala wokutayila. Mina ngizenza engidume ngakho ngincedisana lomfowethu uMagwaza. Kuzabe kutshaywa ingoma zami ezindala futhi ngizethulela abantu bakule indawo idlalade lami elitsha,” kuphetha uSandra.
