uMthunywa
Wayne Ncube
KULENDODA yeJibajiba eLupane ezisolayo kulandela ukweba kwayo ubabhemi osuke waseluma umntanayo kabuhlungu ezama ukumbopha.
Intatheli kaMthunywa ikhulume lomunye wezakhamizi zakulindawo uMnumzana Simon Ndlovu obike ukuba, uMduduzi Nkiwane wesiqintini esingaphansi kuka sobhuku uMnumzana Abel Ncube, eJiba Jiba ku ward 20 ubesejwayele ukutshontsha obabhemi bezinye izakhamizi esiyalima ngabo ensimini yakhe.
“UNkiwane vele ubeselomkhuba omubi njalo lokhu ukuqale nyakenye. Ubetshontsha obabhemi babantu ayelima ngabo. Abantu bebekubona lokhu kodwa bezithulele nje, uze waqeda ukulima insimu zakhe abantu bekhangele nje besesaba ukukhuluma.
“Khathesi webe ubabhemi womunye umfelokazi ngokuswelakala kwenhlanhla ubabhemi lo waluma umntanakhe bekhonangale emasimini,” kulandisa uMnu Ndlovu.
Kubikwa uNkiwane uthi ubabhemi lo wathutsha egijima wasukela umntanakhe wamluma. Intatheli ixoxa loMnumzana Freeman Dube othe: “vele akwenzakali ukuba ubabhemi asukele umuntu ngamanga lawa. Mhlawumbe khathesi uzekele ukweba izifuyo zabantu.”
UMnu Nkiwane ugijimisele indodana yakhe esibhedlela se St Lukes lapho abafike bamdlulisela phambili ngoba umntwana elimele kakhulu.
