uMthunywa
USAKHUZA umhlola umphakathi lomndeni wowesilisa oleminyaka engu-40 okuthiwa ubhokode ngengqamu ugogo wakhe wabe esesidla izicubu zakhe koDambuza, eMgungundlovu indawo eseSouth Africa.
Amalunga omdeni kaNkosikazi Judith Ndlela (90), athi ayoyixoxela amagwababa echobana into ewehlele izolo ekuseni.
UNkosazana Thandeka Ndlela elandisela iphephandaba le-Isolezwe ngokwenzakeleyo uthe, ubelele logogo wakhe ngesikhathi umsolwa eqoqoda ngodlakela efuna bavule ngenkani ekamelweni abalala kulo.
“Uqale ngo-2 eemathathakusa eqoqoda, etshaya lesivalo. Ugogo uthe avulelwe, ubephethe ingqamu. Ulande impepho ekamelweni lakhe wabe eseyitshisa eduze kwalapho obekulele khona ugogo. Ubelokhu ekhuluma into ezingazwakaliyo. Kuthe ngabo-7 ekuseni ugogo elele endlini yokuphumula ngisamenzela ukudla, wavele waqhamuka ekamelweni lakhe wabhokoda ugogo ngoengqamu esifubeni. Ugogo ubelokhu ekhala ethi, ‘kulungile ngane yami uma ngibulawa nguwe’, yilapho engiphume khona endlini ngayacela usizo komakhelwane,” kutsho uNksz Ndlela.
Uthe ubuye lomakhelwane umsolwa elokhu esika izicubu zikamufi ezidla, ebeke lesawudo eceleni kwakhe.
“Ubesidla izicubu zakhe, kukhona lesawudo. Bese sethukile sikhala, simangazwa yinto abeyenza kugogo,” kutsho uNksz Ndlela.
Uthe omakhelwane bafikile bazama ukumnqanda kodwa kwaba nhlanga zimuka lomoya njengoba ubeselolaka.
Omunye umakhelwane okhulume leSolezwe wacela ukuthi igama lakhe ligodlwe ngenxa yobucayi bodaba uthe lamanje kusenzima lokudla ukudla ngenxa yento abayibonayo.
“Besilokhu sizwa kulomsindo sazitshela ukuthi yinto ezaphela. Sizwe abakhona sebememeza saya sithi siyobona ukuthiu kwenzakalani. Sifice ingqamu ithe ngqe esifubeni sikugogo, umsolwa ehlezi kusofa eduze kwesidumbu elokhu esika izicubu, ezidla ziluhlaza zinjalo. Lamanje angikholwa into engiyibone ngamehlo ami,” kutsho umakhelwane ebabaza.
Kuthiwa umsolwa ubesebeke lamanzi esitofini okusolwa ukuthi ubefuna ukupheka ngawo isidumbu sikagogo wakhe.
Indodakazi kamufi uNkszn Busi Ndlela ithe bona bewungumdeni batshaqekile ngoba umufi ubengamathe nolimi lomsolwa.
“Besingalindelanga ukuthi umsolwa angenza lokhu, ngoba akasi muntu ohluphayo kodwa uma eke wanatha utshwala bekungathi uphambanelwa likhanda. Umama (umufi) nguye umuntu obekwazi ukumgoba lumuntu abebezwana laye kakhulu njengoba ubemenzela yonke into. Noma sithetha sithi kayodinga umsebenzi njengoba ezihlalela ekhaya engasebenzi, umama ubemvikela. Bebezwana kakhulu bengehlukani njalo okusiphicayo yikuthi kwenzeke kanjani lokhu,” kutsho yena. Uthe noma embuza umsolwa ukuthi kungani ebulale umufi, kuthiwa akazange aphendule ubelokhu evula amehlo kakhulu, sengathi umqondo uhambile.
NgoZibandlela 5 lonyaka lomdeni bewenzele umufi umcimbi wokugubha iminyaka engu-90 yokuzalwa. Kuthiwa umsolwa wayekhona kodwa kazange ahlanganele labanye emdlalweni.
Abomndeni bathe abazi noma lumcimbi akazange awujabulele yini umsolwa.
Okhulumela amapholisa eKwaZulu-Natal uColonel Thembeka Mbele uthe, kuvulwe icala lokubulala ngemuva kokugwazwa kowesifazane oleminyaka engu-90 amanxeba amanengi.
“Owesilisa oleminyaka engu-40 utshaywe umphakathi wabe esebotshwa amapholisa. Usiwe esibhedlela lapho alindwe khona ngamapholisa,” kutsho uCol Mbele.
Umndeni uthe ufuna umsolwa ajeziswe ngumthethwandaba ngesenzo sakhe. — Isolezwe
