uMthunywa
Mthokozisi Dube
NGESONTO abagadli bakaRahman Gumbo bonke bazathola iHighlanders ivimbe ngci lapho okudlalela khona imvimbi yeTshilamoya uPeter Muduhwa.
Ngalelolanga, iBosso idibana lomakhelwane wayo iChicken Inn eqeqetshwa nguGumbo.
Imvimbi yeBosso uPeter Muduhwa usethumbe inhliziyo zabalandeli beTshilamoya ngoba bethi uvala sengathi udlala okokucina kuleliqembu.
Imvimbi le isiphenduke yabayisithandwa enkundleni yeBarbourfields kumidlalo edluleyo.
Lumdlali ubeqhoba ibhentshi okwamagama kusukela ngesikhathi eqala ukugqoka ijesi kaMantengwane ngomnyaka ka2015, kodwa lokhe ephiwe ithuba lokudlala ngumqeqetshi uErol Akbay kukhanya usedlalela ukuthi linhlanhla ingamphunyuki.
Lokhe waqala ukuvimba loKaputeni wakhe uFelix Chindungwe iBosso ayikaze ihlohlwe okuveza ukuthi ababili laba abavali ibhola kuphela kodwa bavala amanzi.
Kumdlalo wokucina oweBosso leqembu leZPC Kariba umdlali olodumo uLimited Chikafa ubefihlwe nguMuduhwa okokuthi abalandeli benguqu basele bebuzana ukuthi uChikafa ukhona na kulo umdlalo.
Nyakenye uChikafa wasuka ebhentshini wayavuthuza umboko owathuza inethi okwabangela ukukhalala umsebenzi kukaKelvin Kaindu njengomqeqetshi weBosso ngoba uMantengwane wayehaqazwe nge 3-1.
UChindungwe ubike ukuba uMuduhwa akusimuntu omutsha kuye ngoba sewafunda okunengi ngaye ngesikhathi belolonga.
“Njengabadlali uMuduhwa uyabe engamutsha kithi kodwa uyabe efuna ukuthi abalandeli bamenze azizwe ekhululekile enkundleni njalo bamuphe ithemba,” kubika uChindungwe.
Okusuka kuhlanyise abalandeli ngoMuduhwa ayisikuvimba kwakhe kodwa yikuthuma labagadli emavinkilini kanye lokunika abanye abadlali ngoba kungela bhola alilahlayo kumbe elingafikiyo komunye umdlali elisuka enyaweni zakhe.
Umdlalo odlalwe ngamaqembu amabili ngeviki ephelileyo wenze iBosso yachinsa ukunqoba leli qembu nge 1-0, ibhola elihlohlwe nguAdrian Silla kusele phose imizuzu emihlanu ukuthi ihlandla lakuqala liphele.
IZPC Kariba ibiliqembu elizenzela umathanda kuBosso ngoba lingakaze linqontshwe yiyo.
Kumdlalo wangeSonto iBosso idibana lamaGamecocks, iChicken Inn okuliqembu elingahlangananga kuhle ngoba umqeqetshi uRahman Gumbo elokhe ezama ukulihlanganisa kulandela ukulahlekelwa kwalo ngabagadli ababili uMitchel Katsvairo loEdmore Chirambadare bona abathunjwa liqembu likaMotaung iKaizer Chiefs.
Imidlalo yePSL kuliviki lesi-12:
NgoMgqibelo: ZPC Kariba v Chapungu (Nyamhunga), Bulawayo City v Dynamos (Barbourfields), How Mine v Ngezi (Luveve)
NgeSonto: Highlanders v Chicken Inn (Barbourfields), Border Strikers v Harare City (Dulivhadzimu), Triangle v Tsholotsho (Gibbo), Mutare City v FC Platinum (Sakubva), CAPS United v Hwange (National Sports Stadium).
